Дунё бўйлаб миллионлаб мухлисларнинг қалбидан жой олган айрим актриса ва актёрларнинг ижодида икки образни гавдалантирган фильмлар бор.
Николас Кейж «Адаптация» кинофильми
Голливуд актёри Николас Кейжнинг «Адаптация» фильмидаги эгизак ака-ука образи «Оскар» мукофоти совриндорлиги учун мукаммал номзод бўлди. Кинокартинада актёр гавдалантирган образларнинг ташқи кўриниши бир хил, бироқ хулқ-атвори бир-биридан тубдан фарқ қилади. Режиссёр Спайк Жонс томонидан ишланган «Адаптация» фильми 2002 йилда катта экранларга чиққан.
Любов Орлова «Баҳор» кинокартинаси
Ўтган асрнинг энг машҳур киноюлдузларидан бири Любов Орлова «Баҳор» фильмида ёш актриса Вера Шатрова ва олим Ирина Никитина ролини ижро этган. Актриса гавдалантирган образлар ҳар томонлама бир-бирига жуда ўхшаш. Ушбу фильм Россиянинг ўша даврдаги машҳур режиссёрлардан бири Григорий Александров томонидан суратга олинган бўлиб, унда Георгий Юматов, Фаина Раневская, Николай Коновалов каби рус актёрлари ҳам иштирок этган.
Евгений Леонов «Омадли жентлменлар» фильми
Россиянинг дунёга машҳур актёрларидан бири Евгений Леонов «Омадли жентлменлар» фильмида икки хил образда намоён бўлган. Актёр ижро этган образлар хулқ-атвор жиҳатидан бир-бирига қарама-қарши ҳисобланади. Евгений Леонов ушбу кинокартинада жиноятчи ва болалар боғчасидаги тарбиячи ролларини ўйнаган. Фильм режиссёр Александр Серий томонидан суратга олинган ва 1971 йилнинг охирида кинотеатрларда намойиш этилган.
Чарли Чаплин «Буюк диктатор» кинокартинаси
Чарли Чаплин ижодининг юксак намуналаридан бири 1940 йилда АҚШда суратга олинган «Буюк диктатор» фильмидир. Бюджети қарийб 2 миллион долларни ташкил этган фильм «Оскар» мукофотининг бир нечта йўналишларига номзодлик қилган. Актёр фильмда камтар яҳудий сартарош ва бу образга жуда ўхшаб кетадиган, ҳокимиятга чин дилдан хизмат қиладиган диктатор ролини ижро этган.
Жесси Айзенберг «Эгизак» фильми
Режиссёр Ричард Аёади томонидан 2014 йилда намойиш этилган «Эгизак» кинофильмида Жесси Айзенберг иккита образда намоён бўлади. Комедия жанрида ишланган фильмда актёрни бир-бирига ташқи кўриниши жуда ўхшаб кетадиган образларда кўриш мумкин. Ушбу фильмда Голливуднинг машҳур актёрларидан Ричард Гир, Тофер Грэйс, Стивен Моер ҳам иштирок этган.
Юрий Яковлев «Иван Василевич касбини ўзгартиради» кинофильми
Таниқли рус актёри Юрий Яковлев «Иван Василевич касбини ўзгартиради» фильмида икки хил образни ижро этган. Улардан бири кўп гапирадиган Бунша ва иккинчиси Россия тарихида қатъиятлилиги билан шуҳрат қозонган шоҳ образи Иван Грозний бўлган. Ташқи кўринишида бироз фарқ қиладиган бу образлар актёрга катта шуҳрат келтирди. Ушбу кинокартинада энг катта маблағни Юрий Яковлев олган. Михаил Булгаков асари асосида суратга олинган фильмга Леонид Гайдай режиссёрлик қилган.
Марион Котийяр «Яхши митти нарсалар» кинокартинаси
«Такси» кинофильмининг юлдузларидан бири актриса Марион Котийяр «Яхши митти нарсалар» картинасида эгизаклар ролини ўйнаган. Овози унча яхши бўлмаса ҳам куйлашдан чарчамайдиган хонанда Люси ва фақат пул топиш илинжида бўлган Мари образлари Марион Котийярга муваффаққият олиб келди. Режиссёр Жил Паке-Бреннер бошчилик қилган ушбу фильм 2001 йилда катта экранларга чиққан. Актриса фильмдаги роли учун «Цезарь» мукофотига номзодлар қаторига киритилган.
Жан Маре «Фантомас» кинофильми
Машҳур француз актёри Жан Маре «Фантомас» кинофильмининг учта қисмида ҳам икки хил образни гавдалантирган. Трилогиядаги биринчи фильм комиссар Ювенинг қўлга олинмайдиган жиноятчи Фантомасни таъқиб қилиши ва унинг кўплаб саргузаштлари ҳақида. Андре Юбенел режиссёрлигидаги бу фильмнинг биринчи қисми 1964 йилда катта экранларга чиққан.
Жейк Жилленхол «Душман» фильми
Нобель совриндори Хосе Сарамагонинг романи асосида суратга олинган «Душман» фильмида Голливуд актёри Жейк Жилленхол профессор Адам ва актёр Энтони образларида намоён бўлган. Ташқи кўриниши бир хил бўлган образларни бир-биридан кечинмалар, ахлоқий жиҳатлари ажратиб туради. Фильм 2014 йилнинг февраль ойида премьера қилинган.
Мавзуга доир:
- 50 ёшдан кейин машҳур бўлган ва орзуга эришиш учун ҳеч қачон кеч эмаслигини исботлаган юлдузлар (фото)
- Сценарийдан ташқари: суратга олиш майдончасида муштлашиб кетган юлдузлар (фото)
- Етимликда ўтган болалигига қарамай муваффақият қозонган юлдузлар (фото)
- Ван Дамм, Бочелли, Вуйчич ва жисмоний нуқсонига қарамай муваффақиятга эришган бошқа юлдузлар (фото)
Изоҳ (0)