Анжелина Жоли бешинчи фильми учун режиссёрлик курсисига қайтди. Шунингдек, юлдуз Fremantle компанияси билан уч йиллик шартномаси доирасида илк бор фильмда продюсер сифатида дебют қилади, деб ёзади Harper’s Bazaar Kazakhstan.
«Қонсиз» (Without Blood) фильмининг янги актёрлар жамоаси жуда ажойиб тарзда тузилган. Маълум бўлишича, лойиҳада бош ролларни «Оскар» мукофотига номзодлар Салма Хаек ва Демиан Бичир ижро этади.
Сюжетга кўра, фильм Алессандро Барикконинг 2017 йилда чоп этилган худди шу номдаги романининг экранлаштирилган версияси бўлиб, воқеалар ҳарбий тўқнашувдан кейин содир бўлади. Картинада отаси ва акасининг шафқатсиз ўлдирилишига гувоҳ бўлган 4 ёшли Нина исмли қиз ҳақида ҳикоя қилинади. Унинг кўзлари орқали томошабинлар фожиали воқеалар ҳақидаги тўлиқ ҳақиқатни ва одамларнинг қалбида қолган изларни кўриши мумкин. Орадан йиллар ўтгач, Нина қасос йўлини танлайди ва жиноятнинг ҳар бир иштирокчисининг изидан боради. Суратга олиш ишлари Италия жанубидаги Апулия ва Базиликата вилоятларида, шунингдек, Римда ҳам бўлиб ўтади.
«Алессандро Барикко ўзининг ноёб поэзияси, ҳиссиётлари ва уруш манзараси акс этган китобини саҳналаштиришни менга ишониб топширди ва мен бундан жуда ҳам мамнунман. Унинг ҳикояси ҳиссий ғалаён ёки шахсий йўқотишдан кейин нимани қидираётганимиз ҳақидаги саволларга жавоб беради», — деди Анжелина Жоли.
Эслатиб ўтамиз, картина ҳақида биринчи марта 2022 йилнинг март ойида эълон қилинган эди. Премьера санаси ҳали маълум эмас. Шунингдек, Салма 2023 йилда намойиш этилиши режалаштирилган «Сеҳрли Майк»нинг учинчи қисмида ҳам иштирок этади.
Изоҳ (0)