Май ойининг охири яқинлашмоқда, ўқув йили ҳам тугаб бормоқда, олдинда эса болалар орзу қилиб кутган ёзги таътил. Ёз бола учун нафақат дам олиш, балки тикланиш даври ҳамдир. Ўқув йилидаги тинимсиз дарслар, уй вазифалари ва смартфонлар қаршисида ўтаётган соатлар фарзандингиз соғлиғига сезиларли таъсир кўрсатган бўлиши мумкин. Шу сабабли болани таътил даврида қандай текширувлардан ўтказиш кераклиги ҳақида сўз юритамиз.
1. Кўз текшируви
Кўплаб болалар йил охирига бориб мактаб доскасидаги маълумотни яхши кўра олмаётгани ёки китоб ўқиш вақтида тез чарчаб қолаётганидан шикоят қилади. Бу ҳолат кўриш қобилияти пасайганининг белгиси бўлиши мумкин. Ёз фасли эса офталмологга бориб, кўзлар саломатлигини тўлиқ текшириш учун айни вақт.
2. Тиш саломатлиги
Ҳеч қандай оғриқ бўлмаса ҳам, бир йилда икки марта стоматолог кўригидан ўтиш керак. Шифокор кариес, яллиғланиш ёки тиш чиқишидаги муаммоларни эрта аниқлаб, даволашни осонлаштиради ҳамда келажакдаги муаммоларнинг олдини олади.
3. Иммунитет ва умумий таҳлиллар
Болангизнинг умумий аҳволини билиш учун умумий қон ва сийдик таҳлилларини топшириш етарли. Доим ҳам организмдаги муаммолар юзага чиқавермайди, лекин боланинг умумий ҳолатига таъсир қилади. Агар зарур бўлса, терапевт ёки педиатр қондаги маълум витаминлар даражасини ҳам текширади ва таҳлиллар асосида қандай ёрдам бериш кераклиги бўйича батафсил тавсиялар беради.
4. Руҳий саломатлик
Мактаб болалар учун нафақат билим, балки бир оз стресс манбаи ҳамдир. Ёзда фарзандларимиз эмоционал жиҳатдан тикланади. Шу сабабли болалар билан юракдан суҳбатлашиш, уларга сўз эркинлигини бериш, бирга саёҳат қилиш, тўгаракларга қатнашишига изн бериш муҳим дир. Агар фарзандингизни бирор муаммо безовта қилаётган бўлса, болалар психологига мурожаат қилишдан чўчиманг. Баъзида биргина суҳбатнинг ўзи бола учун етарли бўлиши мумкин.
5. Умуртқа поғонаси ва елка
Узоқ вақт дарсда ўтириш ва оғир сумка кўтариш бола қоматига зарар етказиши мумкин. Баъзиларда сколиоз — умуртқа поғонасининг ён томонга қийшайиши ҳам учраб туради. Сколиоз фақат ташқи кўринишга эмас, балки ички аъзолар, нафас олиш ва умумий ҳолатга ҳам салбий таъсир қилади. Шу сабабли ёзги таътил ортопед ёки физиотерапевтга кўриниб, бу муаммоларнинг олдини олиш учун энг яхши вақтдир.
Изоҳ (0)