Британияда бачадони трансплантация қилинган аёл биринчи марта фарзанд дунёга келтирди. Бу ҳақда “Правила жизни” хабар бермоқда.
36 ёшли Грэйс Девидсон бачадонсиз туғилган ва унга ўсмирлик даврида Майер-Рокитанский-Кюстер-Ҳаузер синдроми ташхиси қўйилган. Бу ирсий касаллик бўлиб, унга кўра бачадон бўлмайди ёки тўлиқ ривожланмайди. Шунга қарамай, тухумдонлар фаолиятини давом эттириб, тухум ҳужайраларини ва аёл гормонларини ишлаб чиқаради, бу эса ҳомиладор бўлиш имконини беради.
Грэйс ва унинг турмуш ўртоғи Ангус азалдан фарзандли бўлишни истаган. Британиялик шифокорлар эса уларга донордан бачадонни трансплантация қилишни таклиф этган.
2023 йилда Грэйсга бачадон ўтказиш амалиёти муваффақиятли амалга оширилди. Аёлга унинг опаси Эми Перди донорлик қилди. Эмининг икки нафар фарзанди бор ва келажакда бошқа бола дунёга келтиришни режалаштирмаган.
Амалиётни бажаришдан аввал опа-сингиллар тўлиқ тиббий текширувдан ўтди. Грэйс ва унинг турмуш ўртоғи бепуштликка қарши муолажа олиб, эмбрионларни музлатиб қўйишди. Унинг айтишича, шифокорлар унга суррогат она бўлишни ёки фарзандликка олишни таклиф қилишган, аммо аёл учун фарзандининг ўз танасида ривожланиши муҳим бўлган.
Бачадонни кўчириб ўтказиш амалиёти 17 соат давом этди ва муваффақиятли якунланди. Сўнг Грэйс ЭКУ ёрдамида ҳомиладор бўлди ва февраль ойининг охирида кесарча кесиш орқали соғлом бола дунёга келтирди. Янги туғилган чақалоққа опаси шарафига Эми деб исм қўйди.
Грэйс иккинчи фарзандини дунёга келтиргач, бачадонини олиб ташлаш лозим, чунки у иммунодепрессантлар қабул қилиши керак, акс ҳолда аёл организми янги ўтказилган органни қабул қилмаслиги мумкин. Шифокорларнинг таъкидлашича, бундай препаратлар баъзи турдаги саратон касалликлари хавфини оширади, шу сабабли иммунодепрессантларни узоқ муддат қабул қилиш мумкин эмас.
Эми Изабелнинг туғилиши гинеколог Ричард Смитнинг 25 йиллик тадқиқотлари натижасидир, у бачадонни кўчириб ўтказиш бўйича хайрия ташкилоти Wоmb Transplant UK раҳбари. Шифокор Буюк Британияда вафот этган донор аъзоларидан фойдаланган ҳолда уч марта трансплантация амалга оширган, ҳозирда эса ўнга яқин аёл операция учун тасдиқлаш жараёнидан ўтказилмоқда.
Изоҳ (0)