Жиноят ишлари бўйича Мирзо Улуғбек тумани судида 15 май куни Озода Нурсаидова қўшиғига клип суратга олинаётганда содир бўлган мудҳиш автоҳалокатнинг суд жараёнлари бошланди.
Суд ёпиқ тарзда бўлиб ўтди, чунки жабрланувчини машинада босиб кетган қиз вояга етмаган ва у бор-йўғи 16 ёшда.
Шунга қарамай, Миллий телеканалининг “Миллар” кўрсатуви ижодкорлари судда қатнашиб Сабрина ва унинг адвокати билан суҳбатлашди.
“Тўлиқ тузалганим йўқ, ҳали олдинда 6 ойдан 1 йилгача давом этадиган реабилитация муолажалари турибди, ичимда эса 1 килограммдан ортиқ темир бор. Юрганим билан келажакда турмушга чиқа олмайман, фарзанд кўра олмайман”, дейди Сабрина Жабборова.
Бир неча ой аввал Instagramʼда Шаҳзода Муҳаммедованинг турмуш ўртоғи Марат Ҳамдамов ўзи қураётган уйлардан Сабрина Жабборовага икки хонали квартира бергани ҳақида гап-сўзлар тарқалган эди. Сабринанинг айтишича, унга ҳали уй берилгани йўқ.
“Мендан, уларга паспортимнинг нусхасини юбориб қўйишимни сўрашди, юбордим, 1 ҳафтадан ошди, ҳеч қандай жавоб йўқ. Бу қанчалик тўгри ёки нотўғрилигини билмадим, лекин менга ҳали уй берилгани йўқ”, дейди Сабрина.
“Интернетдаги ҳамма гапларга ҳам ишониб бўлмайди, Марат Хайруллаевичга Сабринанинг телефонидан боғланмоқчи бўлдик, афсуски, уни қора рўйхатга киргизиб қўйишибди, натижада улана олмадик. Бу Марат Хайруллаевич шунчаки интернетда машҳурликка эришиш учун қилинган пиар ҳисобланади”, дея қўшимча қилди Сабринанинг адвокати Зебохон Комилова.
Изоҳ (0)