Навоий вилояти Қизилтепа туманида аёл ҳужжатларда эркак сифатида қайд этилгани аниқланди. Бу ҳақда “Давр” дастурида хабар берилди.
Унда айтилишича, Қизилтепа туманида яшовчи Эркиной Тилавова пенсия ёшига етгач, зарур ҳужжатларни расмийлаштириш жараёнида ўзининг туғилганлик гувоҳномасида исм ва жинси нотўғри кўрсатилганини аниқлаган. Расмий маълумотларга кўра, гувоҳномада унинг исми Эркин деб ёзилган бўлиб, жинси эркак сифатида қайд этилган.
Эркиной Тилавованинг айтишича, бу хатолик шу пайтгача эътиборга олинмаган.
Пенсияга чиқиш учун ҳужжат тайёрлаб юргандим, архивдан Тилавов Эркин чиқди. “Метрика”нгиз чалкаш дейишди. Шу пайтгача ҳужжатларга ишим тушмаганди, дейди у.
Қизилтепа тумани ФҲДЁ бўлими мудираси Маруса Носированинг билдиришича, мазкур нотўғри ёзув асосида фуқаролик паспорти ҳам олинган.
Биз электрон тизим ва Эркиной Тилавова қўлидаги ҳужжатларни таққослаб кўрганимизда фуқаронинг туғилиш далолатнома ёзувларида эркак жинсли фарзанд туғилгани, фамилияси Тилавов ва исми Эркин экани тўғрисида маълумотлар ёзилгани аниқланди. Ҳужжатга ота-онанинг ўзлари тузатиш киритиб қўйишган ва бу билан фуқаролик паспорти олинган. Бугунги кунда электрон тизим бўлгани сабабли муаммога дуч келишган, деди Носирова.
Мазкур ҳолат юзасидан Қизилтепа тумани Адлия бўлими томонидан ФҲДЁ билан ҳамкорликда судга мурожаат қилиниб, фуқаролик фактини аниқлаштириш бўйича даъво аризаси киритилган.
Тегишли ташкилотлар аёлга ҳуқуқий ёрдам кўрсатмоқда ва масала қонуний тартибда ҳал этилиши кутилмоқда.
Маълумот учун, агар ҳужжатда исм ёки жинс нотўғри кўрсатилган бўлса:
Фуқаролик ҳолати далолатнома ёзувларига ўзгартириш киритиш бўйича ариза топширилади
ФҲДЁ бўлимига ёзма ариза билан мурожаат қилинади.
Ариза билан бирга ҳужжатлар (паспорт, мавжуд гувоҳнома, тиббий маълумотнома, гувоҳларнинг кўрсатмалари ва ҳ.к.) топширилади.
ФҲДЁ ариза ва ҳужжатлар асосида таҳлил қилади.
Зарур ҳолатларда суд орқали ҳал этилади
Агар тузатиш оддий тартибда амалга ошириб бўлмаса ёки ҳужжатлар қарама-қарши бўлса, ФҲДЁ фуқарога фуқаролик ҳолати фактини аниқлаш бўйича судга мурожаат қилишни тавсия қилади. Бу ҳолда:
судда исм/жинс нотўғри ёзилгани исботланади (гувоҳлар, далиллар орқали).
суд қарори асосида ФҲДЁ расмий ўзгартириш киритади ва янги гувоҳнома беради.
Изоҳ (0)