Хитойда аҳолини оила қуришга рағбатлантириш мақсадида никоҳ тузиш тартиби соддалаштирилди. Бу ҳақда Sinxua хабар берди.
Маълум қилинишича, янги қоидалар ҳужжатларни топширишни осонлаштиради. Энди никоҳ учун қуйидаги ҳужжатларгина етарли бўлади:
- шахсни тасдиқловчи ҳужжат;
- амалдаги никоҳ мавжуд эмаслиги тўғрисидаги аризалар;
- сўнгги уч авлодда яқин қариндошлик алоқалари йўқлиги тўғрисидаги аризалар.
Бунгача жуфтликлар уй хўжалиги рўйхатига оид китобларни ҳам тақдим этиши керак эди. Энди эса Хитой фуқаролари фақат яшаш жойи бўйича эмас, балки истаган жойда никоҳдан ўтиши мумкин. Ушбу ўзгаришлар 2025 йил 10 майдан кучга киради. Никоҳ тузиш қоидалари мамлакатда 2003 йилдан бери ўзгармаган эди.
Расмийлар янгиликлар вақтни тежаш ва оила қуриш харажатларини камайтиришига ишонади. Чунки кўплаб фуқаролар доимий рўйхатдан ўтган манзилидан (прописка) узоқда яшайди ва ишлайди. Кўплаб хитойликлар ўз она шаҳрига бормаслик учун тўйдан бош тортади.
Шунингдек, мутахассислар тўйларнинг камайишини никоҳ ёшидаги аҳоли сонининг камайиши, муносабатларга бўлган қарашларнинг ўзгариши ва оила қуриш билан боғлиқ харажатларнинг ошиши билан боғламоқда.
Хитойда туғилиш кўрсаткичи кескин пасайган
Хитойда туғилиш даражасини ошириш кампанияси бошланди, у никоҳни рағбатлантириш ва оилаларда болалар сонини кўпайтиришга қаратилган бўлиб, турли жабҳаларни қамраб олади.
Маҳаллий ҳокимият органлари турмуш қурган аёлларга қўнғироқ қилиб, уларнинг фарзанд кўриш режалари билан қизиқмоқда. Аёллар саломатлигини текшириш учун улар консултацияларга таклиф қилинади. Бир ёки ундан ортиқ боласи бор оилалар учун яна бир бола туғилишини рағбатлантирувчи махсус нафақалар назарда тутилган.
Бундан ташқари, Хитойдаги университетлар никоҳ ва севги масалаларига бағишланган махсус курсларни жорий этиши шарт. Ушбу курслар ёлғиз талабаларга мўлжалланган бўлиб, уларга келажакда мамлакатда туғилиш даражасининг ошишига ҳисса қўшиши мумкин бўлган муносабатларни ўрнатишда ёрдам беради.
Изоҳ (0)