Кўп фарзандлилик машҳурлар орасида шунчаки модага эмас, балки ҳақиқий ғояга айланаётганга ўхшайди. Расмий маълумотларга кўра, Илон Маск 4 аёлдан 14 фарзанднинг отаси, бироқ The Wall Street Journal’нинг янги текшируви Қўшма Штатлар жамоатчилигини ларзага солди: аслида Маск ворисларнинг бутун бир “легиони”га эга бўлишга улгурган экан.
Илон Маск яна жанжал марказида
Дональд Трамп АҚШнинг 47-президенти этиб сайланганидан буён, унинг энг яқин тарафдори — тадбиркор Илон Маск жаҳон оммавий ахборот воситалари эътиборидан четда қолмаяпти. Tesla компанияси эгаси гўё атайлаб ўз шахси атрофида янги-янги жанжалларни келтириб чиқараётганга ўхшайди. Гоҳ инаугурацияда яқин орада Марсни забт этишини эълон қилади, гоҳ ўз брендига қарши чиқувчиларга Ким Кардашьян билан фотосессия орқали жавоб беради, баъзида эса ўзининг Х ижтимоий тармоғидаги фойдаланувчиларга унчалик дўстона бўлмаган оҳангда жавоб беришгача бориб етади.
Бироқ Маскнинг шахсиятига энг катта эътибор унинг Трамп билан яқинлашувидан кўра, кўп фарзандли бўлиш ҳақидаги ғайриоддий иштиёқига қаратилмоқда. Унинг тўрт ёшли ўғли Х Æ А-Хии Оқ уйнинг Овал кабинетида бемалол юрган пайтда, қондош ака-ука ва опа-сингилларининг сони геометрик прогрессия бўйича кўпаймоқда. Хусусан, 2025 йил 14 февралда блогер Эшли Сент-Клер миллиардердан ўғил кўрганини маълум қилди.
Эҳтимол, бу вазият ҳеч кимни ҳайратга солмасди, фақат Маск бу ҳақда овоза бўлишини мутлақо истамасди. Айнан шу сабабли воқеа бошқача тус олди: тафсилотларни билиш учун Американинг нуфузли нашриётлари журналистлари шошиб қолди, қиз эса энди йўқотадиган ҳеч нарсаси қолмаганини ўйлаб, батафсил изоҳ беришга рози бўлди. Эшли миллиардер билан муносабатлари ҳақида сўзлаб берди, келишув тафсилотларини ошкор қилди ва буларнинг барчаси фақат ўғли Ромулнинг фаровонлиги ва хотиржамлиги учун зарурлигини қатъият билан таъкидлади.
Энг батафсил текширувни The Wall Street Journal олиб борди. Қизиғи шундаки, дастлаб фақат Сент-Клер иши ҳақида бўлиши кутилган мақола бутунлай бошқа мавзуга айланиб кетди. Маълум бўлишича, Илон Маск сайёрани ўз авлодлари билан тўлдириш ғоясига муккасидан кетган.
Илон Маскнинг бош ғояси
Миллиардер бугунги кундаги энг муҳим муаммо сифатида туғилиш даражасининг пасайишини кўрмоқда. У ўзини пронатализм тарафдорлари сафида эканини очиқ тан олади — улар ушбу муаммонинг сиёсий ва маданий ечимларини амалга оширишга интилаётган кишилардир.
Маскнинг нечта фарзанди борлиги аниқ эмас. The Wall Street Journal’нинг яқин доиралари ва аноним манбалари 14 рақами анча камайтириб кўрсатилган, деб таъкидлашмоқда.
Маълум бўлишича, муаммо Илоннинг болаларни яхши кўришида эмас экан. Меросхўрларнинг дунёга келиши Марсни ўзлаштириш бўйича кенг кўламли бизнес-режанинг бир қисми ҳисобланади. Маскка кўра, цивилизация йўқ бўлиб кетиш хавфи остида, шунинг учун у юқори интеллектга эга бўлган одамларни кўпайтириш орқали тарихий жараённи ўзгартиришга ҳаракат қилмоқда.
НАСА билан ҳамкорлик қилиш бўйича улкан режалар айнан шу мақсад билан боғлиқ, чунки SpaceX’нинг асосий вазифаси Марсга етиб бора оладиган ракета яратишдир. Унинг бошқа компаниялари, жумладан электромобиль ишлаб чиқарувчи Tesla ҳам бу режани молиялаштиришда кўмаклашмоқда.
Маск фарзандлари ва уларнинг оналарини “легион” деб атайди. Бу айнан минглаб аскарларга эга бўлган ва Рим империяси чегараларини кенгайтиришда ҳал қилувчи рол ўйнаган қадимий ҳарбий тузилмалардир.
Миллиардернинг у билан муносабатга киришган аёлга қўядиган ягона талаби — албатта фарзанд кўриш. Илон ўз “қурбонлари”ни кўпинча Х ижтимоий тармоғида излайди: мемларга жавоб беради, лайк босади ва баъзида твит ёзади. Умуман олганда, у ҳам ҳамма эркаклар каби анъанавий йўлдан боради.
Маскнинг маъшуқалари навбатма-навбат суд курашларига аралашиб, унинг хатти-ҳаракатлари ва муносабатларининг ғалати тафсилотларини фош этмоқда. Шу билан бирга, ворислар сони кундан-кунга эмас, соатма-соат кўпайиб бормоқда. Илон Маскнинг нияти ва мақсадлари аниқ бўлса-да, оқибати ҳали номаълум. Воқеалар ривожланишининг икки йўли борга ўхшайди: биринчиси — ота ва фарзандлари ҳақиқатан ҳам Марсни забт этади, иккинчиси — тадбиркор кўплаб “хотин”ларининг жиддий айбловлари гирдобига тушиб қолади.
Бу ерда Эмбер Хёрднинг нима алоқаси бор?
11 май куни Европа ва Америкада халқаро Оналар куни нишонланди. Бу йилги байрам айрим кутилмаган янгиликлар билан эсда қолди — Эмбер Хёрд ижтимоий тармоқларида эгизакларнинг онаси бўлганини эълон қилди. Жонни Депп билан жанжалли ажралишдан сўнг актриса Испанияга кўчиб кетган ва тўрт ёшли қизи Уна Пейжнинг тарбияси билан шуғуллана бошлаганди.
Эҳтимол, Оушен исмли ўғли ва Агнес исмли қизи суррогат она ёрдамида дунёга келган, чунки Эмбернинг ўзи соғлиғидаги муаммолари сабаб фарзанд кўра олмайди.
Аммо обуначилар болаларнинг отаси ким эканлиги ҳақида жиддий ўйланиб қолишди. Албатта, Эмбернинг ўзи унинг исмини айтмаган. Мантиқий мулоҳазалар аудиторияни қизиқарли хулосага олиб келди — болаларнинг отаси Илон Маск бўлиши мумкин. Чунки:
- Эмбер Хёрд ва Илон Маск 2016 йилда 1,5 йил муносабатда бўлган;
- Актрисанинг ҳамкасби таъкидлашича, жуфтлик ишқий муносабатлари даврида бир нечта эмбрион яратган ва кейинчалик ҳатто уларга бўлган ҳуқуқлар учун судлашган;
- Маълумки, Илон Маск кўп фарзандли бўлиш ғоясига муккасидан кетган: унинг назарида собиқ эр-хотиндан туғилган фарзандлар мутлақо табиий ҳолат ҳисобланади.
Ҳозирча томонларнинг ҳеч бири бунга расмий изоҳ бермаган, шунинг учун Илон Маскнинг Оушен ва Агнеснинг отаси экани ҳақида фақат тахмин қилиш мумкин.
Изоҳ (0)