May oyining oxiri yaqinlashmoqda, o‘quv yili ham tugab bormoqda, oldinda esa bolalar orzu qilib kutgan yozgi ta’til. Yoz bola uchun nafaqat dam olish, balki tiklanish davri hamdir. O‘quv yilidagi tinimsiz darslar, uy vazifalari va smartfonlar qarshisida o‘tayotgan soatlar farzandingiz sog‘lig‘iga sezilarli ta’sir ko‘rsatgan bo‘lishi mumkin. Shu sababli bolani ta’til davrida qanday tekshiruvlardan o‘tkazish kerakligi haqida so‘z yuritamiz.
1. Ko‘z tekshiruvi
Ko‘plab bolalar yil oxiriga borib maktab doskasidagi ma’lumotni yaxshi ko‘ra olmayotgani yoki kitob o‘qish vaqtida tez charchab qolayotganidan shikoyat qiladi. Bu holat ko‘rish qobiliyati pasayganining belgisi bo‘lishi mumkin. Yoz fasli esa oftalmologga borib, ko‘zlar salomatligini to‘liq tekshirish uchun ayni vaqt.
2. Tish salomatligi
Hech qanday og‘riq bo‘lmasa ham, bir yilda ikki marta stomatolog ko‘rigidan o‘tish kerak. Shifokor kariyes, yallig‘lanish yoki tish chiqishidagi muammolarni erta aniqlab, davolashni osonlashtiradi hamda kelajakdagi muammolarning oldini oladi.
3. Immunitet va umumiy tahlillar
Bolangizning umumiy ahvolini bilish uchun umumiy qon va siydik tahlillarini topshirish yetarli. Doim ham organizmdagi muammolar yuzaga chiqavermaydi, lekin bolaning umumiy holatiga ta’sir qiladi. Agar zarur bo‘lsa, terapevt yoki pediatr qondagi ma’lum vitaminlar darajasini ham tekshiradi va tahlillar asosida qanday yordam berish kerakligi bo‘yicha batafsil tavsiyalar beradi.
4. Ruhiy salomatlik
Maktab bolalar uchun nafaqat bilim, balki biroz stress manbai hamdir. Yozda farzandlarimiz emotsional jihatdan tiklanadi. Shu sababli bolalar bilan yurakdan suhbatlashish, ularga so‘z erkinligini berish, birga sayohat qilish, to‘garaklarga qatnashishiga izn berish muhim dir. Agar farzandingizni biror muammo bezovta qilayotgan bo‘lsa, bolalar psixologiga murojaat qilishdan cho‘chimang. Ba’zida birgina suhbatning o‘zi bola uchun yetarli bo‘lishi mumkin.
5. Umurtqa pog‘onasi va yelka
Uzoq vaqt darsda o‘tirish va og‘ir sumka ko‘tarish bola qomatiga zarar yetkazishi mumkin. Ba’zilarda skolioz — umurtqa pog‘onasining yon tomonga qiyshayishi ham uchrab turadi. Skolioz faqat tashqi ko‘rinishga emas, balki ichki a’zolar, nafas olish va umumiy holatga ham salbiy ta’sir qiladi. Shu sababli yozgi ta’til ortoped yoki fizioterapevtga ko‘rinib, bu muammolarning oldini olish uchun eng yaxshi vaqtdir.
Izoh (0)