Баъзида болалар ухлашни истамайди. Бунга сабаб қоронғиликдан қўрқиш, ётоқ остидаги “махлуқлар”, ёки шунчаки кун тугашини хоҳламаслик бўлиши мумкин. Қуйида боланинг тезроқ ва енгилроқ ухлашига ёрдам берадиган содда усуллар билан танишинг.
Ёстиқ ва адёлга лаванда спрейи сепиш
Лаванда тинчлантирувчи ва дам берувчи хусусиятга эга. Унинг мойи уйқуга тез киришга ёрдам беради. Тайёр спрейни дўкондан сотиб олишингиз мумкин, лекин ўзингиз ҳам тайёрласангиз бўлади. Ярим стакандан бир оз камроқ сувга 15 томчи лаванда мойи қўшинг. Шундан кейин уни пуркагичли идишга солиб, ҳар кеча ёстиқ, адёл ёки бола ётадиган ўйинчоқларга сепинг. Фақат ишлатишдан олдин идишни чайқатишни унутманг.
Эслатма: 2 ёшгача бўлган болаларда лаванда мойларига аллергия бўлиши мумкин. Шунинг учун аввал шифокор билан маслаҳатлашинг.
Болага енгил массаж қилиш
Тадқиқотларга кўра, болани ҳар куни кечқурун 15 дақиқа массаж қилса, у тезроқ ухлайди ва чуқур уйқуга кетади. Айниқса, 1,5 ёшгача бўлган болаларда бу усул самарали.
Массаж боланинг асаб тизимини тинчлантиради, стресс гормони кортизолни камайтиради, бахт гормонини чиқаришга ёрдам беради. Бундан ташқари, у ота-она ва бола орасидаги яқинликни оширади.
Массажни қўл ва оёқлардан бошланг, сўнг қорин, бел ва энг охирида юзни мулойим ҳаракатлар билан массаж қилинг.
Уйқудан олдин ижодий машғулотлар
Рассомчилик, бўяш ёки эртак ўйлаб топиш — буларнинг ҳаммаси болани тинчлантиради. Бола ётишдан олдин расм чизиши ёки сиз билан кичик спектакл ўйинини ўйнаши мумкин. Бунда бола кун давомида йиғилган ҳиссиётларини чиқаради ва уйқуга тайёр бўлади. Яхшиси, фон учун секин мусиқа қўйинг ва болага юмшоқ қаламлар беринг.
Бола билан гаплашиш
Баъзида ухлашга мажбур қилиш ўрнига, оддийгина суҳбат фойдалироқ бўлади. Ундан сўранг: куни қандай ўтди, нима ҳақида ўйлаяпти, тушида нимани кўрди. Ўзингиз ҳам кун давомида сизни қувонтирган ёки хафа қилган воқеалар ҳақида айтиб беринг. Бу боланинг ўзини хавфсиз ҳис қилишига ёрдам беради. Гаплашаётганда қўлидан ушланг ёки қучоқланг.
Актив ўйин ўйнаш
Машҳур шифокор Лоран Кантрелл боласи билан “Аравача” ўйинини ўйнайди. Боланинг оёғидан ушлаб, қўлларида юргизади. Бу ўйин нафақат кулгили, балки асаб тизимини тинчлантирувчи машқ ҳам ҳисобланади. Бу усул 3 ёшдан катта болалар учун мос.
Тана ҳаракати мияга кучли сигнал юборади ва болани тезроқ дам олиш ҳолатига олиб келади.
Тўғри мусиқа танлаш
Тинч, секин ритмдаги мусиқа болани тезроқ ухлатади. Масалан, классик қўшиқлар, табиат товушлари ёки оддий инструментал куйлар фойдали. Ҳар куни бир хил мусиқани қўйиш тавсия қилинади — бу болада хавфсизлик ҳиссини уйғотади.
Аммо эсда тутинг: ҳар бир боланинг ўз диди бўлади. Баъзилар Моцартни ёқтирса, бошқалар Чалантано остида ухлайди. Энг яхши маслаҳат — болангизнинг ўзини тинглаш.
Энг яхши маслаҳатчилар бу ўз фарзандларини яхши биладиган ота-оналар. Сиз ҳам болангизга нима яхши таъсир қилишини тажриба қилиб, билиб оласиз.
Изоҳ (0)