Таиланднинг Паттая шаҳрида оғир касалликка чалинган ўзбекистонлик фуқаро ватанга қайтарилди. Бу ҳақда “Дунё” ахборот агентлиги хабар берди.
Маълум қилинишича, 3 март куни Ўзбекистон фуқароси I.С. Таиланднинг Паттая шаҳрида инсультга чалиниши натижасида шошилинч тарзда касалхонага ётқизилган. У оғир жарроҳлик операциясини бошдан кечирган. Амалга оширилган муолажаларга қарамай, бемор танасининг чап томони ишламай қолган.
Фуқаро Таиландга ишлаш мақсадида келган, аммо тиббий суғурта олмаган, шунингдек, иш берувчи билан меҳнат шартномасини ҳам тузмаган. Бу ҳолатлар тиббий харажатларни тўлашда қийинчиликлар сабаб бўлган. 28 март куни беморнинг яқинлари, дўстлари ва фаол ватандошлар саъй-ҳаракатлари билан тиббий харажатларни қоплаш ва Uzbekistan Airways самолёти орқали беморни оиласи бағрига қайтариш учун зарур маблағ йиғилган.
Бундай ҳолатлар кўпайиб бораётгани муносабати билан Ўзбекистоннинг Бангкокдаги Бош консулхонаси Ўзбекистон фуқароларига чет элга саёҳат қилиш ёки ишлаш учун кетаётганда тиббий суғурта олиш, шунингдек, иш берувчи билан меҳнат шартномасини тузиш зарурлигини эслатиб ўтди. Ушбу чора-тадбирлар фавқулодда вазиятларда ҳимоя ва зарур ёрдам олишда асқатади.
“Биз барча фуқароларни чет элда бўлиш вақтида ўз саломатлигига эътиборлироқ бўлишга чақирамиз”, дейилади дипломатик ваколатхона хабарида.
Бош консулхона хорижда оғир аҳволда қолган ўзбекистонликларга консуллик-ҳуқуқий ёрдам кўрсатиш ишларини давом эттираётганини билдирди.
28 март куни Мьянма ва қўшни Таиландда 7,7 ва 6,4 магнитудали иккита кучли зилзила юз берганди. Бангкокдаги Ўзбекистон Бош консулхонаси берган маълумотга кўра, зилзиладан сўнг жароҳат олган Ўзбекистон фуқаролари аниқланмади. Бош консулхона Таиланднинг тегишли идоралари билан алоқада ва вазиятни диққат билан кузатиб бормоқда.
Изоҳ (0)