“Америкаликларнинг 53 фоизи Эпштейн иши Трамп туфайли эълон қилинмаяпти деб ҳисоблайди” — сўровнома

АҚШ аҳолисининг қарийб 53 фоизи машҳур америкалик молиячи Жеффрей Эпштейн иши бўйича тергов материалларининг бир қисми АҚШнинг амалдаги президенти Дональд Трамп номи тилга олингани сабабли эълон қилинмаётганига ишонади. Бу YouGov тадқиқот хизмати сўрови натижаларидан маълум бўлди.

Яна 21 фоиз америкаликлар ҳукуматнинг Эпштейн иши бўйича барча маълумотларни тўлиқ ошкор қилишдан бош тортиши бошқа сабаблар билан боғлиқ деб ҳисоблайди. Сўралганларнинг 25 фоизи эса бу масалада ўз фикрини билдира олмаган.

Материаллар айнан Трамп туфайли эълон қилинмаётганига асосан АҚШ Демократик партияси тарафдорлари ва мамлакатнинг икки асосий сиёсий кучидан бирортасини қўллаб-қувватламайдиган мустақил сайловчилар ишонади.

“Бу фикрни демократларнинг 84 фоизи ва мустақил сайловчиларнинг 53 фоизи қўллаб-қувватлайди. Республикачилар орасида эса бу фикрни атиги 20 фоиз қўллаб-қувватласа, 48 фоизи бунга қўшилмайди”, дейилади нашр э`лон қилган мақолада.

Шу билан бирга, АҚШ аҳолисининг 61 фоизи Трамп номи Эпштейн иши материалларида у ёки бу тарзда учрашига ишонади, 12 фоизи бунга қўшилмайди, 28 фоизи эса жавоб беришга қийналган. Ҳужжатларда АҚШ президенти номи борлигига демократларнинг 86 фоизи, мустақил сайловчиларнинг 60 фоизи ва республикачиларнинг 34 фоизи ишонади.

Америкаликларнинг 45 фоизи Трампни Эпштейн жиноятларига бевосита алоқадор деб ҳисоблайди, 28 фоизи бундай фикрларни рад этади, 27 фоизи эса аниқ фикр билдира олмаган. Бу позицияни асосан демократлар (77%) ва мустақил сайловчилар (45%) қўллаб-қувватлайди. Республикачилар партияси тарафдорлари орасида бу фикрни атиги 11 фоиз қўллаб-қувватлайди.

Шу билан бирга, АҚШ аҳолисининг 64 фоизи Эпштейн жиноятларининг барча гумон қилинаётган иштирокчиларига нисбатан пухта ва ҳар томонлама тергов ўтказилишига ишонмайди ва бунинг натижасида айрим шахслар жавобгарликдан қутулиши мумкин деб ҳисоблайди.

Респондентларнинг 21 фоизи бунга қарши фикрда, 16 фоизи эса аниқ жавоб бера олмаган. Терговнинг мутлақ холислигига нафақат демократлар, балки республикачилар ҳам шубҳа билдирган. Республикачиларнинг 57 фоизи, демократларнинг 72 фоизи ва мустақил сайловчиларнинг 61 фоизи барча айбдорлар жавобгарликка тортилишига ишонмайди.