“Ризеспор” клуби ва Ўзбекистон терма жамоаси футболчиси Ҳусниддин Алиқулов Туркия Суперлигаси 28-тури доирасидаги “Бодрум”га қарши кечган учрашувда жароҳат олди. Футболчи ўйиннинг 44-дақиқасида рақиб футболчи билан тўп учун кечган кураш жараёнида тўқнашиб кетди ва майдонни тарк этди.
Клуб футболчининг ҳолати ҳақида расмий баёнот берди. Унга кўра, Алиқулов Режеп Таййип Эрдоған Университети касалхонасида текширувдан ўтказилган. Ташхис натижасига кўра, унинг бурни ва ёноқ суяги синиб кетгани аниқланди. Ҳозирда футболчининг даволаниш жараёни бошланган.
Унинг қанча муддатга сафдан чиққани очиқланмаган. ЎФА ҳам ушбу маълумотни тасдиқлади.
“Клуб томонидан ўтказилган тиббий текширувлар натижасида Алиқуловнинг бурун ва ёноқ қисмида суяк синиш ҳолати аниқланиб, футболчига жарроҳлик амалиёти қўлланди. Ушбу вазиятдан келиб чиққан ҳолда, тиббий штаб тавсияси билан Ҳусниддин Алиқулов терма жамоамиз йиғинида қатнаша олмайдиган бўлди.
Temuр Кападзе бошчилигидаги мураббийлар томонидан миллий жамоа сафига “Насаф” клуби ҳимоячиси Ғолиб Ғайбуллаев жалб этилди”, дейилади матбуот хизмати хабарида.
Маълумот учун, Ўзбекистон миллий жамоаси март ойида иккита учрашувда майдонга тушади. Дастлаб 20 март куни “Бунёдкор” стадионида Қирғизистонга қарши майдонга тушадиган ўзбекистонликлар, 5 кун ўтиб Эронга қарши саф тортади.
Изоҳ (0)