Бухорода 11 дона мих ва тўғноғич ютиб юборган йигитга ёрдам кўрсатилди. Бу ҳақда Республика шошилинч тиббий ёрдам илмий маркази Бухоро филиали хабар қилди.
Марказ филиалига 2005 йилда туғилган бемор кўнгил айниши, ошқозон соҳасида оғриқ ва овқат ўтишининг қийинлашиши шикоятлари билан мурожаат қилган. У икки кун олдин кўп миқдорда тўғноғич ва мих ютганини билдирган. Бемор психиатр назоратида рўйхатда турган.
Рентген текширувида ошқозон ва 12 бармоқли ичакда кўп сонли металсимон ёт жисмлар, ФГДС (фиброгастродуоденоскопия) текширувида эса ошқозоннинг пилорик қисмида ва катта эгрилигида 2×5 см ўлчамли тўғноғич ҳамда михлар борлиги аниқланган.
Беморда зудлик билан эндоскопик жарроҳлик амалга оширилиб, босқичма-босқич 5 дона тўғноғич ва 6 дона мих ошқозон ва 12 бармоқли ичак бўшлиғидан олиб ташланган.
Хабарда айтилишича, сўнгги йилларда аҳоли ўртасида ошқозон, ичак органларига ёт жисмларнинг тушиши содир бўлган ҳолатлар билан тиббиёт муассасаларига мурожаатлар сони статистик маълумотларга кўра нисбатан кўпайиши қайд қилинмоқда. Ёт жисмларнинг ошқозон, ичак ва бошқа органларга тушиши ҳолатлари 1 ёшдан 25 ёшгача бўлган эркак ва аёлларда кўп учрайди.
2025 йилнинг январида фарғоналик 2 ёшли қизалоқнинг қорнидан 135 та магнит шарча чиқариб олинганди. Ўша ойда қозоғистонлик жарроҳлар 4 ёшли боланинг ичакларидан 39 та магнит шарни олиб ташлаганди. 20 февраль куни Қозоғистоннинг Олмаота шаҳрида жарроҳлар икки ёшли боланинг ошқозонидан 105 дона магнитли мунчоқни чиқариб олгани хабар қилинганди.
Изоҳ (0)