Рим папаси Франциск 3 март куни икки марта “ўткир нафас етишмовчилиги”ни бошидан кечирди. Шундан сўнг у тун бўйи ухлагани ва ҳали ҳам уйғонмагани айтилмоқда. Бу ҳақда CBS News хабар берди.
Шифокорлар папа оғирлашганидан кейин нафас қисилишидан халос бўлиши учун иккита бронхоскопия ўтказган. Мазкур ҳолат “бронхлар ичидаги шилимшиқнинг сезиларли даражада тўпланиши ва бунинг оқибатида юзага келадиган бронхоспазм” туфайли юзага келгани айтилмоқда.
Рим папасининг ўпкасида пневмонияга айланган бронхит аниқлангани учун касалхонага ётқизилган. Ҳозирда аҳволи мўтадил. Рим папаси Франциск 2025 йилнинг 14 февраль куни бир неча кунлик нафас олишдаги қийинчиликлардан сўнг енгил иситма билан Римдаги касалхонага ётқизилган эди.
18 февралда папага қўйилган икки томонлама ўпка яллиғланиши ташхиси унинг ёшидаги ҳар қандай бемор учун ташвишли бурилиш бўлди.
Маълумотларга кўра, бу папанинг 2013 йилда Рим-католик черкови раҳбариятини ўз қўлига олганидан бери тўртинчи касалхонага ётқизилиши. У 2021 йилда қорин бўшлиғида жиддий жарроҳлик амалиётини ўтказган. Бундан ташқари, 2023 йилда чандиқ тўқимасини ва қорин чуррасини даволаш мақсадида яна бир операцияни бошдан кечирган. Ёшлигида папа касалликдан сўнг ўпкасининг бир қисмини олдириб ташлаган, шунинг учун тез-тез нафас йўллари касалликлари хуружидан азият чекади.
Францискнинг тиззасида ҳам муаммолар бор, шу сабабли у сўнгги йилларда ногиронлик аравачаси ва ҳассадан фойдаланмоқда.
Изоҳ (0)