Баҳор бошланиши аниме мухлисларидан кўра дорама ишқибозларини кўпроқ қувонтиради, чунки Ли Донг Ук, Бай Лу, ИУ, Пак Бо Гом ҳамда бошқа севимли актёрларни экранларда кўришимиз мумкин.
2025 йил март ойининг энг кутилган дорамалари
“Картошка тадқиқ қилиш институти”
- Мамлакат: Жанубий Корея
- Премьера: 1 март
Янги романтик драмада тоғ водийсидаги Картошкачилик илмий-тадқиқот институти ходимларининг ҳаёти тасвирланади. Со Пек Хо — ўз соҳасини мукаммал биладиган янги келган директор, аммо шахсий ҳаёти ҳавас қиларли эмас. Институтда у тажрибали тадқиқотчи Ким Ми Гёнг билан танишади. Улар биргаликда нафақат энг ажойиб картошка навини яратишга, балки мустаҳкам севги муносабатларини ҳам қуришга ҳаракат қиладилар.
“Шимолга”
- Мамлакат: Хитой
- Премьера: 3 март
Актриса Бай Лу 90 йилларнинг охиридан бугунги кунгача бўлган воқеаларни акс эттирувчи янги сериалда бош ролни ўйнайди. Хитой тарихи ҳақидаги мазкур фильм бир даврда яшаган, мамлакат билан бирга ўзгарган, бирга улғайган ўсмирларнинг ҳаётини тасвирлайди. Сериал машҳур ёзувчи Сюй Сзе Ченнинг шу номдаги романи асосида суратга олинган.
“Музокаралар олиб бориш санъати”
- Мамлакат: Жанубий Корея
- Премьера: 8 март
Юн Жун О компаниялар қўшилиши ва сотиб олиниши бўйича мутахассис бўлиб, бутун бир профессионаллар жамоасига раҳбарлик қилади. У энг фойдали шартлар асосида келишувга эришиб, мижозларга улар ҳатто орзу ҳам қилмаган шартномани тақдим эта олади. Дорама бундай ёпиқ соҳада ишлашнинг ички томонини кўрсатади ва шубҳасиз, кўпчиликни янада юксак даражадаги мутахассис бўлишга ундайди.
“Гиперпичоқ”
- Мамлакат: Жанубий Корея
- Премьера: 19 март
Ёшлигида Чон Се Ок истиқболли нейрожарроҳ эди, бироқ профессор Чой Док Хи билан келишмовчилик туфайли бир куни жарроҳлик хонасини жанжал билан тарк этади. Расман кетган бўлса-да, Се Ок ўз истеъдодини яширин тарзда бўлса ҳам одамлар манфаати йўлида ишлатишни давом эттиради. Вазият устоз ва шогирдни яна юзма-юз келтиради.
“Кайдзу № 8”
- Премьера: 28 март
Бу йилнинг ёзида тақдим этилиши кутилаётган иккинчи мавсум премерасидан олдин, студия биринчи мавсумнинг асосий воқеаларини акс эттирувчи фильм-рекапни чиқаради. Бу ерда янги нарсани кўриш амри маҳол, бироқ агар биринчи қисм аллақачон хотирадан кўтарилган бўлса, эслатма сифатида хизмат қилиши мумкин.
Ҳикоя янги воқелик ҳақида бўлиб, унда инсонлар махлуқлар — кайдзулардан ҳимояланади. Кафка Хибино доимо Мудофаа корпусига қўшилиб, махлуқлар ҳужумларини қайтаришга ёрдам беришни орзу қилган, аммо касалланиб, кайдзуга айланиш қобилиятига эга бўлиб қолади.
Изоҳ (0)