Қозоғистоннинг Олмаота шаҳрида жарроҳлар икки ёшли боланинг ошқозонидан 105 дона магнитли мунчоқни чиқариб олди. Бу ҳақда Tengrinews хабар берди.
20 февраль куни Болалар шошилинч тиббий ёрдам марказига 2 ёш-у 3 ойлик бола ёт жисмни ютиб юборгани бўйича шикоят қилинган. Ота-онасининг сўзларига кўра, тахминан бир ҳафта олдин меҳмонга борганида, бола металл магнитларни ютиб юборган бўлиши мумкин. Аммо уларнинг аниқ сони номаълумлиги таъкидланган.
Қорин бўшлиғи аъзолари рентгенографиясида ўлчами 6,2×2,2 сантиметр бўлган кўплаб металл буюмлардан иборат конгломерат аниқланди. Бола ёт жисмни олиб ташлаш учун шошилинч равишда касалхонага ётқизилди.
Дастлаб мутахассислар буюмларни эндоскопик йўл билан ажратиб олишга ҳаракат қилди, бироқ магнитларнинг зич тўпланиши туфайли бунинг иложи бўлмади. Жарроҳлик амалиёти — лапаротомия ва гастротомия ўтказишга қарор қилинди. Жарроҳлик амалиёти давомида боланинг ошқозонидан 105 дона магнитли мунчоқ чиқариб олинди, дейилади хабарда.
Жарроҳлик амалиётидан сўнг бемор реанимация бўлимига, кейин эса жарроҳлик бўлимига ўтказилган. Ҳозирда боланинг аҳволи қониқарли.
Бу Қозоғистонда бола номаълум жисмни ютиб юборган биринчи ҳолат эмас
- Январь ойида қозоғистонлик жарроҳлар 4 ёшли боланинг ичакларидан 39 та магнит шарни олиб ташлаганди. Ўшдан операция деярли бир соат давом этган.
- 2024 йил эса Қозоғистонда 10 та магнит ютиб юборган бола вафот этган. Ҳодиса июль ойи бошида Рудний шаҳрида кузатилган. Уни болалар шифохонасига олиб боришган, бироқ бола бир неча кун ўтиб вафот этган.
- 2023 йилда Қозоғистонда 3 яшар бола тўртта игна ва “замок” бош қисмини ютиб юборган. Шифокорлар боланинг кўкрак қафаси ва қорин бўшлиғини рентген қилган ва унинг ошқозонида “замок”нинг бир қисмини ва учта тикув игнасини аниқлаган. Бола касалхонанинг жарроҳлик бўлимига ўтказилган, у ерда игналар олиб ташланган.
- Шу йилда Қозоғистонда икки яшар бола 11 та магнитни ютиб юборгани аниқланган. Бола 4 февраль куни шошилинч равишда вилоят болалар шифохонасига ётқизилган. Унинг қорнида қаттиқ оғриқ қайд этилган ва қайта-қайта қайт қилган. Қорин бўшлиғи органларининг рентгенографияси болада номаълум жисм мавжудлигини кўрсатган. Шифокорлар уни олиб ташлаган.
Изоҳ (0)