Массачусетс федерал округ суди АҚШ президенти Дональд Трампнинг Таълим вазирлигини тарқатиб юбориш тўғрисидаги фармонини тўхтатиб қўйди ва оммавий қисқартиришлар доирасида ишдан бўшатилган ходимларни қайта тиклашни буюрди. Бу ҳақда Associated Press ахборот агентлиги хабар бермоқда.
Трамп 20 март куни Америка Таълим вазирлигини ташкил этилганидан 45 йилдан ортиқ вақт ўтгач, уни тарқатиб юбориш жараёнини бошлаш тўғрисидаги фармонни имзолаганди.
“Федерал судья пайшанба куни президент Дональд Трампнинг Таълим вазирлигини тугатиш тўғрисидаги фармонини тўхтатиб қўйди ва вазирликка оммавий қисқартиришлар пайтида ишдан бўшатилган ходимларни қайта тиклашни буюрди”, дейилади хабарда.
Судья Жун Мён Жин ўз қарорида даъвогарлар “молиявий ноаниқлик, кечикишлар, ўқувчилар ва ўқитувчилар таянадиган муҳим маълумотларга киришнинг чекланиши”, шунингдек, аҳолининг энг заиф қатламлари учун асосий таълим хизматларининг йўқолиши оқибатида юзага келиши мумкин бўлган “тузатиб бўлмас зарарнинг аниқ манзарасини” кўрсатиб берганини таъкидлаган.
Унинг айтишича, бундай кўламдаги ишдан бўшатишлар “вазирлик фаолиятини деярли тўхтатиб қўяди”. У маъмуриятнинг идорани ёпиш эмас, балки “қайта ташкил этиш” ҳақидаги баёноти “ҳақиқатга мутлақо тўғри келмаслигини” алоҳида қайд этган.
Агентлик маълумотларига кўра, март ойидаги қисқартиришлар эълон қилинганидан сўнг вазирликдан 1,3 мингга яқин ходим ишдан бўшатилган. Натижада вазирлик ходимлари сони қарийб икки бараварга 4,1 мингдан тахминан 2 минг нафаргача қисқарган.
Қўшимча қилинишича, Трамп маъмурияти аллақачон апелляция берган. Оқ уй вакили судьянинг қарорини “яна бир бор ваколатдан ошиш” деб атаган ва ислоҳотдан мақсад вазирликни ёпиш эмас, балки унинг самарадорлигини ошириш эканини билдирган.
Февраль ойида АҚШнинг 14 та штатидан демократ прокурорлар ва расмийлар президент Дональд Трамп ва Ҳукумат самарадорлиги департаменти (DOGE) раҳбари Илон Маскни судга берганди.
Изоҳ (0)