АҚШ президенти Дональд Трампни танқид қилган француз олими конференция учун АҚШга келганида мамлакатдан чиқариб юборилди. Бу ҳақда Le Monde хабар берди.
Олим март ойида Қўшма Штатлардаги конференцияда қатнашиш учун йўл олган. АҚШга етиб келганида аэропортда текширувдан ўтказилган. Унинг иш компьютери ва шахсий телефони кўздан кечирилгач, мамлакатга киришга рухсат берилмаган.
Франция Миллий илмий тадқиқот маркази топшириғи билан Ҳьюстон яқинидаги конференцияга кетаётган француз тадқиқотчисининг АҚШга киришига рухсат берилмагани ва у мамлакатдан чиқариб юборилганини эшитиб, хавотирга тушдим, деди Франция олий таълим ва илмий тадқиқотлар вазири Филипп Батист.
Вазирга кўра, тегишли чора Америка ҳукумати томонидан қабул қилинган. Чунки тадқиқотчининг ҳамкасблари ва дўстлари билан ёзишмаларда Трамп маъмуриятининг тадқиқот сиёсати ҳақида шахсий фикр билдирилган.
Фикр эркинлиги, эркин тадқиқот ва академик эркинлик — биз доимо фахр билан ҳимоя қиладиган қадриятлар. Мен барча француз тадқиқотчиларининг қонунга риоя этган ҳолда бу қадриятларга амал қилиш ҳуқуқини ҳимоя қилишни ўз зиммамга оламан, дея ваъда бермоқда вазир Батист.
Дипломатик манбанинг Франция ахборот агентлигига маълум қилишича, воқеа 9 март куни содир бўлган. АҚШ расмийлари француз тадқиқотчисини “нафрат ва фитна акс этган хабарлар тарқатиш”да айблаган. Олим Федерал қидирув бюроси текшируви ҳақида хабардор қилинган, бироқ АҚШга кетишидан олдин унга “айбловлар бекор қилингани” айтилган.
Франция тадқиқотлар вазири Трамп маъмурияти ва Илон Маскни илмий тадқиқотлар бюджетини сезиларли даражада қисқартиргани учун очиқчасига танқид қилган. Тадқиқотчининг АҚШга кириши рад этилган куниёқ Батист америкалик тадқиқотчиларни Францияга кўчиб ўтишга чақирган мактубини эълон қилган.
Кўплаб таниқли тадқиқотчилар аллақачон Қўшма Штатлардаги келажаги ҳақида ўйламоқда. Табиийки, биз уларнинг маълум бир қисмини қутламоқчимиз, деган у.
Изоҳ (0)