Украина тинчлик битими эвазига ўз назоратидаги Донецк ва Луганск вилоятлари ҳудудларини Россияга топширмайди. Бу ҳақда президент Владимир Зеленский 17 август куни Еврокомиссия раҳбари Урсула фон дер Ляйен билан матбуот анжуманида маълум қилди.
Зеленский аввал ўт очишни тўхтатиш, ундан кейин тинчлик келишуви устида ишлаш кераклигини айтди.
“Путиннинг талаблари кўп, биз уларнинг барчасини билмаймиз. Агар улар биз эшитганимиздек кўп бўлса, уларнинг ҳаммасини кўриб чиқиш учун кўп вақт керак бўлади.
Буни эса қурол босими остида қилиш мумкин эмас. Шунинг учун аввало оташкесим бўлиши, сўнг тезкор тарзда якуний келишув устида ишлаш керак. Биз бу ҳақда Вашингтонда (18 август куни Трамп билан учрашувда) гаплашамиз”, деди Украина президенти.
У ҳудудий масала фақат Россия ва Украина президентлари томонидан АҚШ иштирокидаги уч томонлама учрашувда муҳокама қилиниши кераклигини айтди.
“Россия ҳамон Донецк вилоятида муваффақиятга эришолмаяпти, Путин 12 йил давомида уни эгаллай олмади”, дея қўшимча қилди Зеленский.
У Украина Конституциясига кўра, “ҳудудларни топшириш ёки ер билан савдо қилиш мутлақо имконсиз” эканини таъкидлади.
Зеленский 18 август куни Оқ уйда Трамп билан учрашиб, Украинада тинчлик ўрнатиш масаласини муҳокама қилади. АҚШ етакчиси билан учрашувда Европа давлатлари президентлари, жумладан: Финляндия президенти Александр Стубб, Германия канцлери Фридрих Мерц, Буюк Британия бош вазири Кир Стармер ва Франция президенти Эммануэл Макрон иштирок этади.
Sky News хабарига кўра, музокараларда Италия бош вазири Жоржа Мелони ҳам иштирок этади. Йиғилишга фон дер Ляйен ва НАТО бош котиби Марк Рютте ҳам қўшилиши кутилмоқда.
Изоҳ (0)