Париждаги норозилик намойишлари пайтида талабалар акцияси иштирокчилари АҚШ байроғини йиртиб, АҚШ президенти Дональд Трамп ва унинг тариф сиёсатига қарши шиорлар айтишди. Бу ҳақда “РИА Новости” хабар бермоқда.
Таъкидланишича, Парижда таълим соҳасидаги тўққизта касаба уюшмасининг чақириғига биноан ўқитувчилар ва талабалар намойишга чиққан. Акция Таълим вазирлиги олдидан бошланган. Иштирокчилар Франциянинг собиқ бош вазири, ҳозирги таълим вазири Элизабет Борнни танқид қилувчи плакатлар кўтариб олишган.
Улар ахлат қутиларига ўт қўйишган, витриналар ва банкоматларни синдиришга уринишган. Бир оз вақт ўтгач, акция иштирокчилари полиция қаршилигига дуч келган, бироқ намойишчилар тўхтамай, ҳуқуқ-тартибот ходимларига қарата петардалар ота бошлаган. Тажовузкор кайфиятдаги намойишчиларга қарши жавоб чораси сифатида полициячилар калтак ва кўздан ёш оқизувчи газдан фойдаланган.
3 апрель куни давлат сектори ходимларини миллий акцияларга CGT, UNSA, FSU вa Solidaires касаба уюшмалари чақирди. Норозилик намойишлари давлат хизматчиларининг харид қобилияти пасайишига қарши ўтказилмоқда.
Баёнотда касаба уюшмалари 2025 йилни “давлат сектори учун қора йил” деб атади. Уларнинг таъкидлашича, ҳукумат иш ҳақини индексация қилмасдан, таътил тўловларини камайтириб ва давлат хизматлари сектори бюджетини қисқартириб, “ижтимоий адолатсизлик” туфайли 64 ёшда пенсияга чиқиш билан уларни кўпроқ ишлашга мажбурламоқчи.
Хусусан, таълим соҳаси ходимлари бошланғич ва ўрта мактабларда 250 га яқин ўқитувчилик ставкалари қисқартирилгани, бунинг оқибатида 223 та синф ёпилганини танқид қилишди. Шунингдек, улар пенсия ислоҳотини бекор қилишни ва таътиллар учун тўлиқ тўловни талаб қилмоқда.
Касаба уюшмалари ҳукумат “давлат харажатлари ва ижтимоий суғурта учун 9,1 миллиард евро ажратишни бекор қилганини” мудофаа харажатлари эса, аксинча, ошганини таъкидлади.
Франциянинг 2025 йил учун илгари қабул қилинган бюджети давлат харажатларини жиддий қисқартиришни назарда тутади. Шу билан бирга, ҳарбий харажатларнинг ўсиши қайта кўриб чиқилмади: мудофаа вазирлиги қўшимча 3,3 миллиард евро олади, унинг бюджети 50,5 миллиард еврони ташкил этади. Мудофаа вазири Себастьян Лекорнюнинг айтишича, мамлакат мудофаа бюджетини деярли икки баробарга ошириб, йилига 100 миллиард еврога етказиши керак.
Бундан олдин Трамп ишлаб чиқариш ва миллий хавфсизлик учун ўта муҳим бўлган товарлардан ташқари, АҚШга етказиб бериладиган барча товарларга бож жорий этиш қарорини эълон қилганди. Давлатлар учун тарифлар, ҳатто фақат пингвинлар яшайдиган ҳудудлар учун ҳам камида 10 фоизни, баъзи мамлакатлар учун эса 49 фоизгача бўлди.
Изоҳ (0)