Massachusets federal okrug sudi AQSH prezidenti Donald Trampning Ta’lim vazirligini tarqatib yuborish to‘g‘risidagi farmonini to‘xtatib qo‘ydi va ommaviy qisqartirishlar doirasida ishdan bo‘shatilgan xodimlarni qayta tiklashni buyurdi. Bu haqda Associated Press axborot agentligi xabar bermoqda.
Tramp 20-mart kuni Amerika Ta’lim vazirligini tashkil etilganidan 45 yildan ortiq vaqt o‘tgach, uni tarqatib yuborish jarayonini boshlash to‘g‘risidagi farmonni imzolagandi.
“Federal sudya payshanba kuni prezident Donald Trampning Ta’lim vazirligini tugatish to‘g‘risidagi farmonini to‘xtatib qo‘ydi va vazirlikka ommaviy qisqartirishlar paytida ishdan bo‘shatilgan xodimlarni qayta tiklashni buyurdi”, deyiladi xabarda.
Sudya Jun Myon Jin o‘z qarorida da’vogarlar “moliyaviy noaniqlik, kechikishlar, o‘quvchilar va o‘qituvchilar tayanadigan muhim ma’lumotlarga kirishning cheklanishi”, shuningdek, aholining eng zaif qatlamlari uchun asosiy ta’lim xizmatlarining yo‘qolishi oqibatida yuzaga kelishi mumkin bo‘lgan “tuzatib bo‘lmas zararning aniq manzarasini” ko‘rsatib berganini ta’kidlagan.
Uning aytishicha, bunday ko‘lamdagi ishdan bo‘shatishlar “vazirlik faoliyatini deyarli to‘xtatib qo‘yadi”. U ma’muriyatning idorani yopish emas, balki “qayta tashkil etish” haqidagi bayonoti “haqiqatga mutlaqo to‘g‘ri kelmasligini” alohida qayd etgan.
Agentlik ma’lumotlariga ko‘ra, mart oyidagi qisqartirishlar e’lon qilinganidan so‘ng vazirlikdan 1,3 mingga yaqin xodim ishdan bo‘shatilgan. Natijada vazirlik xodimlari soni qariyb ikki baravarga 4,1 mingdan taxminan 2 ming nafargacha qisqargan.
Qo‘shimcha qilinishicha, Tramp ma’muriyati allaqachon apellyatsiya bergan. Oq uy vakili sudyaning qarorini “yana bir bor vakolatdan oshish” deb atagan va islohotdan maqsad vazirlikni yopish emas, balki uning samaradorligini oshirish ekanini bildirgan.
Fevral oyida AQSHning 14 ta shtatidan demokrat prokurorlar va rasmiylar prezident Donald Tramp va Hukumat samaradorligi departamenti (DOGE) rahbari Ilon Maskni sudga bergandi.
Izoh (0)