АҚШда “Титаник” фильмидаги эшикнинг бир парчаси Heritage Auctions ким ошди савдосига қўйилди, деб хабар бермоқда “Правила жизни”. Унинг бошланғич нархи 40 минг доллар деб белгиланган, аукцион эса 20—24 март кунлари бўлиб ўтади.
Ушбу эшик Титаник чўкканидан сўнг Жек (Леонардо Ди Каприо) ва Роуз (Кейт Уинслет) нинг сувдаги кадрларида пайдо бўлади. Роуз синган эшик парчаси устида жон сақлаб қолади. Жек эса унинг хавфсизлигини таъминлаш учун ўзини қурбон қилади.
Heritage Auctions таъкидлашича, мазкур эшик бўлаги 1912 йилдаги Титаник фалокатидан қутқарилган энг машҳур ва ҳақиқий реквизит саналади. У Янги Шотландиянинг Галифакс денгиз музейида сақланадиган Людовик XV услубидаги декоратив панелга жуда ўхшашдир.
Бундан ташқари, ким ошди савдосида фильмнинг сўнгги саҳналарида суратга тушган бош қаҳрамон либоси, қутқарув ғилдираги ва штурвал сотувга қўйилган.
1997 йилда “Титаник” фильми намойиш этилганидан буён кўпчилик томошабинлар Жек ҳам омон қолиши мумкин эди деб айтади. Чунки эшик бўйи 2,5 метр, эни эса 1 метр бўлган ва унга икки киши бемалол сиға оларди, деб таъкидлайди мухлислар.
Бироқ “Титаник” режиссёри Жеймс Кемероннинг фикрича, Жекнинг ўлими муқаррар эди: эшик икки киши вазнини кўтара олмай, чўкиб кетар эди. Бунинг устига, Роуз ҳаётини хавф остига қўйиш Жекнинг характерига зид эди.
Режиссёр ўз фикри ҳақиқат эканлигини исботлаш учун каскадёрлар ёрдамида худди бош қаҳрамонлар вазнидек инсонлардан кинонинг айнан эшик билан боғлиқ саҳнасини қайта яратди, шунингдек у суд-тиббий экспертларга ҳам мурожаат қилди.
Тажриба ҳақиқатдан ҳам эшикда икки киши жон сақлай олмаслиги ва чўкиб кетишини тасдиқлади.
Изоҳ (0)