Австралиянинг Davidson Auctions компанияси актёр Рассел Кроу ва Николь Кидманнинг дастхатлари туширилган шифтнинг бир қисмини ким ошди савдосига қўйди. Бу ҳақда Australian Financial Review’га таяниб “Правила жизни” нашри хабар берди. Аукцион 20 июль шанба куни соат 11:00 да бўлиб ўтади.
Сотувга қўйилган лот 2013 йилда ёпилгунга қадар Сиднейда жойлашган Darcy’s ресторани шифтининг бир парчаси эди. 2001 йилда Расселл Кроу мазкур ресторанга ўзининг бир қанча машҳур ҳамкасблари ва яқинлари билан ташриф буюрган.
У ерда актёр “Гладиатор” фильми учун “Энг яхши актёр” номинациясида “Оскар” мукофотини олганини нишонлаган. Фильм Ридли Скотт томонидан суратга олинган ва миллионлаб томошабинларга манзур бўлган эди.
Зиёфат пайти меҳмонлардан бири стол устига сакраб чиқиб олади ва қўлидаги мукофот ҳайкалчасини юқорига кўтарди. Зиёфат вақтида у тасодифан ҳайкалча билан рестораннинг гипсокартон шифтини тешиб қўяди. Бундай қилмиши учун у етказилган моддий зарарни қоплаш ўрнига Кроу ва Кидманга шикастланган ҳудудга дастхат қўйишни таклиф қилади.
Darcy’s ресторанининг эгаси Аттилио Маринанжели улардан пул талаб қилмади ва аксинча, воқеаларнинг бундай ривожидан фақатгина хурсанд эди.
Фото: True local
Дастхат ёнида Кроу “аморе” сўзини ҳам ёзиб қўйди (италян тилидан “севги” деб таржима қилинади). Кейинчалик бу ёзув кесилиб, бир парча шифт бўлаги фотосурат рамкасига солиб қўйилган ва рестораннинг кириш қисмига осиб қўйилган. Ёзув у ерда ресторан ёпилиб кетгунга қадар қолди.
Қайд этилишича, Рассел Кроу Darcy’s ресторанининг доимий мижози бўлган ва ҳатто ўзининг собиқ рафиқаси Даниэль Спенсерга ўша ерда турмуш қуриш таклифини берган.
Изоҳ (0)