Бугун, 5 март куни Тошкент шаҳрида президент Шавкат Мирзиёев бошчилигида коррупцияга чек қўйишга оид йиғилиш ўтказилмоқда. Мажлисда давлат раҳбари аввалги фавқулодда вазиятлар вазири Абдулла Қўлдошевни ишдан олиш сабабини маълум қилди.
Президент матбуот котиби хабарига кўра, вазир ва унинг ўринбосарлари лавозимидан озод этилиши соҳада қонун бузилиш ҳолатлари кўпайгани билан боғлиқ.
Қурилиш соҳаси энг коррупциялашган соҳалардан бири эди. “Шаффоф қурилиш” дастури жорий этилганидан кейин бу йўналишда ҳам ижобий ўзгаришлар сезилмоқда. Илгари инвестиция дастурига кирган объектларни қурадиган пудратчилар мингтага ҳам етмасди. Ўтган йили 13,5 мингта объект қурилишида 4 мингдан зиёд пудратчи иштирок этди. Соҳа рақамлашгани ҳисобига ўтган 4 йилда 3,6 триллион сўм бюджет маблағи тежалди. Лекин қурилишга рухсат бериш, бинони топширишда ёнғин хавфсизлиги бўйича бюрократия ва қонун бузилиш кўпайиб кетгани учун ўтган ҳафта фавқулодда вазиятлар вазири ва унинг ўринбосарлари ишдан олинди”, дейилади хабарда.
Шу билан бирга, йиғилишда аҳолига ер бериш жараёнида коррупция камайгани маълум қилинган.
Тизимда инсон омили ва қоғозбозликни камайтиришга алоҳида эътибор қаратилмоқда. Масалан, аҳолига ер бериш жараёнида фуқаролар ҳоким ва унга яқин идоралар ўртасида сарсон бўлиб юрарди. Умуман, бу соҳа коррупция “ўчоғи”га айланган эди. Ерни ҳоким қарори билан ажратишдан тўлиқ воз кечилиб, аукцион тизимига ўтилгани натижасида бу тизим халқчил бўлди, дея қайд этган манбада.
Эслатиб ўтамиз, жорий йил 25 февраль куни Ботир Қудратхўжаев янги фавқулодда вазиятлар вазири этиб тайинланган. Унгача, 2022 йил март ойидан бери Абдулла Қўлдошев мазкур вазирликни бошқариб келган.
Изоҳ (0)