Ўзбекистон товар-хом ашё биржасининг avtoraqam.uzex.uz электрон савдо платформасида ўтказилган навбатдаги онлайн аукционлар натижасида жами 697 дона авторақам сотилди. Бу ҳақда биржа матбуот хизмати хабар қилди.
Сотилган авторақамларнинг катта қисми — аниқроғи, 644 таси (яъни 96 фоиздан ортиғи) жисмоний шахслар томонидан харид қилинди. Қолган рақамлар эса юридик шахслар томонидан сотиб олинган.
Савдо платформасида энг паст нархда харид қилинган авторақам қиймати 1 миллион 900 минг сўмни ташкил этди. Шунингдек, 20 май куни энг юқори нархда сотилган “чиройли” авторақам 722,3 миллион сўмга баҳоланди.
Мазкур сумма 2025 йил бошидан буён қайд этилган энг юқори нарх сифатида қайд этилди.
Юқори нархга сотилган “чиройли” авторақамлар
Бундан аввал авторақамлар онлайн аукционида сотувга қўйилган 01 888 BBB авторақами 965 миллион 250 минг сўмга сотилгани ҳақида хабар берилганди. Дастлаб 337 миллион 500 минг сўм бошланғич нарх билан савдога қўйилган бу авторақамнинг нархи аукцион тугаш вақтига қадар 965 миллион 250 минг сўмга кўтарилган.
Эслатиб ўтамиз, Ўзбекистонда 2023 йилда онлайн аукционлар орқали 87 мингдан зиёд авторақамлар сотилганди. Сотилган автомобиль рақамларининг жами қиймати 396,1 миллиард сўмни ташкил этган. Энг қиммат “чиройли” авторақам юридик шахсга 450 миллион сўмга сотилган.
2024 йилда 195 мингдан зиёд авторақамлар онлайн аукционлар орқали сотилган.
Сотилган авторақамларнинг 97 фоизи жисмоний шахслар, 3 фоизи юридик шахслар томонидан харид қилинган. Сотилган авторақамларнинг энг паст баҳоси 1,7 млн сўмни, энг қиммат авторақамнинг қиймати эса 965,3 млн сўмни ташкил қилди.
Изоҳ (0)