Тошкент шаҳрида 200 мингдан ортиқ пулли тўхташ жойларини ташкил этиш режалаштирилган. Бу ҳақда пойтахт ҳокимлигида бўлиб ўтган учрашувда “Toshkent Invest” компанияси раисининг рақамли трансформация ва ахборот технологиялари бўйича биринчи ўринбосари Александр Гурко маълум қилди.
“Spot”нинг ёзишича, биринчи босқичда йўл бўйидаги тўхташ жойлари учун 13−14 минг ўринга мўлжалланган 86 та участкани фойдаланишга топшириш режалаштирилган. Хусусан, биринчи пулли автотураргоҳлар синов тариқасида март ойида — эҳтимол, Миробод ва Яккасарой туманларининг айрим кўчаларида ишга туширилади. 2025 йил июлидан бошлаб пулли автотураргоҳлар оммавий равишда жорий этилиши кутилмоқда.
Гурко Тошкент шаҳар ягона паркинг ахборот тизимини ишлаб чиқиш бўйича тендерда ғолиб чиққан Streetpark Systems компанияси ҳозирда мобил илова яратиш устида иш олиб бораётганини таъкидлади. У орқали ҳайдовчилар пойтахтдаги автотураргоҳлар учун тўловларни амалга оширишлари мумкин бўлади.
Унинг сўзларига кўра, пулли автотураргоҳлар тўртта тариф зонасига бўлинган: соатига 5, 8, 10 ва 12 минг сўм. Бунда, Иқтисодиёт ва молия вазирлиги билан келишилгандан сўнг энг юқори тариф 30 минг сўм этиб белгиланди.
Пулли тўхташ жойларини жорий этиш орқали ҳокимлик тирбандликларни камайтириш ва ҳаракат тезлигини оширишни кутмоқда. Масалан, Саид Барака кўчасининг бир қисмида 250 та автотураргоҳ ташкил этилмоқда.
Натижада тартибга солинган автотураргоҳ тирбандликни 18 фоизга камайтириши, ўртача ҳаракат тезлигини 14 фоизга ошириши (37 км/соатдан 42 км/соатгача) ва коммунал хизматлар учун қулай шароит яратиши прогноз қилинмоқда. Худди шундай ҳисоб-китоб Тўйтепа кўчасининг 65 ўринли қисми учун ҳам ўтказилди: тирбандликлар 20 фоизга камаяди, ўртача ҳаракат тезлиги эса 15 фоизга — соатига 35 километрдан 40 километргача ошади.
Автотураргоҳ учун тўловларни назорат қилиш махсус планшетлар ва автомобиллар билан жойларда текширувчи видеокузатув камералари ёрдамида амалга оширилади. Тўлов қилмаганлик учун маъмурий жавобгарлик фақат 2026 йилдан бошлаб жорий этилиши мумкин.
Александр Гурко Тошкентда кўп қаватли автотураргоҳларни ташкил этиш учун жойлар ўрганилишини, улар одамлар гавжум нуқталар, жумладан, бозорлар яқинида қурилишини ҳам айтган. Шунингдек, автотранспорт йўлларига яқин жойда жойлашган автотураргоҳларни ташкил этиш имконияти ўрганилмоқда. Бу ишларни 3 ойда якунлаб, натижалари бўйича тақдимот қилиш режалаштирилган.
Тошкентда пулли тўхташ жойлари
Тошкентда автомобиллар учун йўл бўйларида пулли тўхташ жойлари ташкил этилиши ҳақида 2021 йилда маълум бўлганди. 2024 йил 16 октябрь куни Шавкат Умурзоқов Тошкент шаҳрида транспорт воситаларининг пулли тўхтаб туриш фаолиятини янада такомиллаштириш чора-тадбирлари тўғрисидаги қарорни имзолади. Ҳужжатда пулли тўхтаб туриш жойларидан фойдаланганлик учун тўловлар миқдори ҳам тасдиқланди.
Пулли тўхтаб туриш жойларини ташкил этиш ҳуқуқи учун аукционда дастлаб Balcomуз қўшма корхонаси ғолиб бўлганди. Компания 3 йил давомида автотураргоҳларни ижарага олиш учун тахминан 120 миллиард сўм таклиф қилган, аммо келишув тасдиқланмаган. 2024 йил 17 декабрь куни такрорий аукцион ўтказилиб, бошланғич нархдан 10 фоизга юқори нарх (62,93 миллиард сўм) таклиф этган. Streetpark Systems компанияси ғолиб бўлди.
Изоҳ (0)