Тошкент аэропортида такси ва бошқа хизматлар учун жойлар ижараси аукционга қўйилди

Uzbekistan Airports бошқарув компанияси Тошкент аэропортида жой ижараси учун «E-auksion» сайтида бир нечта лотларни жойлаштирди. 

Улар орасида умумий овқатланиш ва чакана савдо шохобчалари, савдо автоматлари ва такси хизматлари учун жойлар мавжуд. 

Ижара майдонларининг аксарияти ҳозирда реконструкция қилинаётган учиб кетиш залининг чап томонида жойлашган.

Ҳозирда аукцион учун ўнта лот қўйилган. Учиб кетиш зали ва почта-юк комплексида савдо автоматларини жойлаштириш учун жой ижарага берилади. 

2 квадрат метр майдонга учта савдо автомати (қаҳва/снеклар/ичимликлар) жойлаштирилади. Лотнинг бошланғич суммаси йилига 28,8 млн сўм.

Умумий овқатланиш пунктини ташкил қилиш учун аэропорт учта жойни таклиф этади — иккитаси жўнаш терминалининг «стерил» зонасида ва биттаси эстакада остидаги майдон — ҳозирги JUМ кафеси. 

Кафе-бар учун учиб кетиш залида 25 квадрат метр ва 80 квадрат метр майдонлар, тўлиқ ошхона ташкил қилиш имкониятисиз, ижарага берилади. 

Ўрнатилган талабларга мувофиқ, ижарачи компания умумий овқатланиш соҳасида тажрибага эга ва таниқли бренд бўлиш билан бирга, TripAdvisor маълумотларига кўра Тошкентдаги энг яхши 10 та умумий овқатланиш брендлари қаторида бўлиши лозим. 

Биринчи жойда бир квадрат метрнинг бошланғич қиймати 785 минг сўм, иккинчи жойда 390 минг сўмни ташкил этади. 

Шунингдек, узоқ йиллардан буён JUМ бренди остида фаолият юритиб келаётган кафе учун ижарачи қидирилмоқда. 

Ресторанда тўлиқ фаолият олиб борувчи ошхона мавжуд. Умумий майдони 217 квадрат метр бўлган объектнинг йиллик бошланғич қиймати 586,5 млн сўмни ташкил этади.

Учиб келиш залида такси хизмати учун пештахта ва офис хонаси ҳам савдога қўйилган. 

Ариза берувчи компания уч йилдан ортиқ бўлмаган бензинли автомашиналар паркига, шунингдек, камида уч йиллик тажрибага эга бўлган ҳайдовчилар таркибига эга бўлиши керак. 

Терминал олдидаги биринчи қаторда ҳар доим камида бешта машина бўлиши лозим. Лотнинг йиллик бошланғич баҳоси – 188,82 млн сўм.

Барча лотлар учун батафсил техник топшириқлар белгиланган бўлиб, барча талабгор компаниялар уларга риоя қилишлари лозим. Акс ҳолда, ижарага берувчи, ким ошди савдоси якунида ғолиб бўлган компания билан шартнома тузишни рад этишга ҳақли. 

Бундан ташқари, ижарачи компаниялар оффшор зоналарда банк ҳисоб рақамларига (бу уларнинг таъсисчиларига ҳам тегишли), шунингдек солиқ қарзлари ва бошқа мажбурий тўловлар бўйича қарздор бўлмаслиги лозим. 

Ижарачиларга қўйиладиган талаблар ва бошланғич нархлар «E-auksion» веб-сайтида ҳар бир лот бўйича мавжуд. 

Лотларда, кимошди савдоси қоидаларига кўра, аукцион давомида камида 10 фоизга ошиши мумкин бўлган бошланғич йиллик суммалар кўрсатилган.