Нобель қўмитаси иқтисодиёт бўйича мукофот совриндори билан боғлана олмади. Шу сабабли уни ярим тунда мукофотнинг бошқа соҳиби уйига келиб уйғотишга мажбур бўлди (видео)

12 октябрь куни Стокгольмда иқтисодиёт бўйича Нобель мукофоти совриндорлари номи эълон қилингани тўғрисида хабар берилганди. Meduza’нинг ёзишича, мукофот ташкилотчилари совриндорлардан бири билан боғлана олмай, унинг ҳамкасбидан ёрдам сўраган.

Нобель қўмитаси Стэнфорд университетидан бўлган Пол Милгромга у ўзининг ҳамкасби ва қўшниси Роберт Уилсон билан биргаликда иқтисодиёт бўйича мукофотни қўлга киритганини маълум қилиш учун боғлана олмаган. Шундан сўнг Уилсон рафиқаси билан биргаликда ярим тунда Милгромнинг уйига бориб, ҳамкасби уйғонгунига қадар эшикни тақиллатиб турган.

https://twitter.com/Stanford/status/1315631500080148480

Уилсон вазиятни тушунтирган: «Пол! Мен Боб Уилсонман. Сен Нобель мукофотини олдинг. Сен билан боғланишга уринишди, бироқ бундан ҳеч нима чиқмаган. Қўмитада рақаминг йўқ экан». Уилсон рафиқаси билан мукофот ташкилотчиларига Милгромнинг мобил телефони рақамини берган ва иқтисодчидан қўмитанинг қўнғироқларига жавоб беришни сўраган.

Америкалик Пол Милгром ва Роберт Уилсон мукофотга ким ошди савдоси назариясини такомиллаштиргани ва янги аукцион форматларини ихтиро қилгани учун лойиқ кўрилган.

Маълумот учун, 2020 йилда Нобель мукофотига сазовор бўлганлар: Жаҳон озиқ-овқат дастури (тинчлик мукофоти), шоира Луиза Глюк (адабиёт бўйича), Эммануэль Шарпантье ва Женнифер Дудне (кимё бўйича), Ҳарви Олтер, Майкл Хаутон ва Чарльз Райсг (тиббиёт ва физиология бўйича), Рожер Пенроус, Андреа Гез ва Рейнхард Генцель (физика бўйича).

Эслатиб ўтамиз, 2020 йилда Нобель мукофоти миқдори оширилган бўлиб, 10 миллион швед кронаси (тахминан 1,1 миллион доллар)ни ташкил этади.