Дастлаб моҳир бодибилдер сифатида танилган, “Терминатор”, “Йиртқич” ва “Қизил жазирама” каби ажойиб жангари фильмлардаги роллари туфайли халқаро юлдузга айланган 77 ёшли Шварценеггер ўзининг қимматбаҳо автомобилини сотувга қўйди.
Унинг дунёдаги энг кучли ва эксклюзив суперкарлардан бири бўлган ноёб Bugatti Veyron Grand Sport Vitesse автомобили 1200 от кучи ҳамда W16 двигателига эга. 1500 Нм айланиш моменти билан жиҳозланган бу машина атиги 92 дона тиражда ишлаб чиқарилган бўлиб, Голливудда ҳашамат тимсоли саналади.
Мазкур автомобиль шахсан Шварценеггер томонидан алоҳида буюртма асосида тюнинг қилинган. Bugatti White Silver Metallic рангдаги эксклюзив бўёқ билан қопланган, салон эса Havana бренди терисидан ишланган материал билан жиҳозланган. Автомобиль актёр томонидан Калифорнияда губернаторлик қилган даврида фойдаланилган бўлса-да, атиги 10 000 километр йўл босган, шу сабабли суперкар деярли янги ҳолатда сақланган.
Гарчи автомобилнинг аниқ нарх эълон қилинмаган бўлса-да, Шварценеггер ушбу модел учун 2,5 миллион доллар тўлаган. Демак, автомобиль бундан ҳам юқори баҳога сотилиши мумкин, чунки Bugatti Veyron Grand Sport Vitesse қимматбаҳо автомобилларни коллекция қиладиган шахслар орасида алоҳида аҳамиятга эга.
Бироқ бундай автомобилга хизмат кўрсатиш харажатларига катта маблағ талаб қилади. Масалан, Bugatti’да мой алмаштириш нархи янги бир автомобиль баҳосига тенг бўлиши мумкин.
Изоҳ (0)