Австриянинг Kriesel фирмаси Арнолд Шварценеггернинг буюртмасига асосан тўлиқ электрлаштирилган Mercedes-Benz G-Clаss автомобилини йиғди, деб хабар беради «Мотор».
Ягона нусхада тайёрланган йўлтанламасга иккита электродвигатель ўрнатилди.
Kriesel компанияси турли немис автомобиллари асосида яратилган бир нечта электр автомобиллари билан танилган. Масалан, аввалроқ фирмада VW Golf, Porsche Panamera, универсал BMW 3-Series ва бошқа моделлар йиғилган. Kriesel хусусий батареялар тайёрлаш билан шуғулланади ва Австрияда умумий сиғими йилига 800 минг киловатт-соат бўлган аккумуляторлар ишлаб чиқарадиган завод қурмоқда.
Австриялик ишлаб чиқарувчилар Шварценеггер учун йиғилган автомобилда оғирлиги 510 килограмм, сиғими 80 киловатт-соат бўлган иккита батарея блокидан, шунингдек, 490 от кучига эга электромотордан фойдаланди. Автомобиль 5,6 секундда 100 км/соат тезликка эришади, энг юқори тезлиги соатига 183 километр. Бир марта тўлиқ қувват билан автомобиль 300 километрдан ортиқ масофани босиб ўтади.
Автомобилнинг ташқи кўриниши оддий G-Clаss'дан Kriesel эмблемаси мавжудлиги билан фарқланади. Аккумуляторни қувватлаш розеткаси бензин баки қопқоғининг ўрнида жойлашган. Шу билан бирга, салонда бошқа қурилмалар панели пайдо бўлган. Бу панелда энди тахометр йўқ, ёқилғи миқдорини кўрсатувчи белги батарея тасвири билан алмаштирилган. Компания электр йўлтанламасни кўп миқдорда ишлаб чиқаришни режалаштирмаган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)