Мадриднинг “Реал” клуби кейинги мавсум олдидан юқори даражадаги футболчи харид қилишни режалаштирмоқда. Бу ҳақда АS нашри журналисти Хоакин Марото хабар берган.
Манбага кўра, “қироллик клуби” ёзда, Клублар ўртасидаги жаҳон чемпионати якунлангач, янги футболчи билан шартнома имзолашни мўлжалламоқда. Ҳозирча унинг исми ошкор қилинмаган, бироқ трансфер нархи 100 миллион евродан ортиқ бўлиши кутилмоқда.
Аввалроқ “қаймоқранглилар” “Борнмут” футболчиси Дин Хейсон билан шартнома имзолагани хабар қилинган эди. Шунингдек, мадридликлар АҚШда бўладиган Клублар ўртасидаги Жаҳон чемпионатига қадар “Ливерпуль” аъзоси Александр-Арнольд трансферини ҳам расман эълон қилиши кутилмоқда.
Эслатиб ўтамиз, “Реал Мадрид” жорий мавсум Чемпионлар Лигаси чорак финалида “Арсенал”га имкониятни бой берди. Шунингдек, клуб Испания Кубоги ва Суперкубоги финалига етиб борди, бироқ ҳар иккала учрашувда ҳам “Барселона”га мағлуб бўлди. Жамоа Ла Лига 37-турдан сўнг турнир жадвалида 2-ўринни эгаллаб турибди.
Изоҳ (0)