Мадриднинг “Реал” клуби трансфер бозорида ўзининг стратегияси бўйича ишлашда давом этади. Яъни клуб сўнгги йилларда юқори нархлардаги трансферлардан кўра, юлдуз футболчиларни шартномаси тугаганидан кейин эркин агент сифатида жамоага олиб келишни йўлга қўйган. Мадридликлар бу сафар “Ливерпуль” аъзоси Иброҳим Конатени ўз сафига қўшиб олиш устида ишламоқда.
Испаниянинг Marca нашри хабарига кўра, “қаймоқранглилар” Иброҳим Конатенинг атрофидаги вазиятни кузатиб турибди. Клуб ушбу футболчини 2026 йилда, шартномаси якунига етгач, бепул қўлга киритишни режалаштирган. “Реал” Конатени узоқ муддатли лойиҳага мос футболчи сифатида кўрмоқда ва уни Франция терма жамоасидаги шериклари — Мбаппе, Чуамени, Камавинга ва Менди билан тезда тил топишиб кетади дея ҳисобламоқда.
Мадридликлар бу ёндашув орқали нафақат трансфер харажатларини камайтиришни, балки барқарорликни таъминлашни ҳам мақсад қилган. Ўтган ёзда “қаймоқранглилар” бу стратегияни ишга солиб, “ПСЖ” ҳужумчиси Килиан Мбаппени эркин агент сифатида ўз сафига қўшиб олганди.
Маълумот учун, Конате жорий мавсум “Ливерпуль” таркибида 39 учрашувда майдонга тушиб, 2 гол ҳамда 2 ассист муаллифига айланган. Transfermarkt портали француз ҳимоячисининг нархини 60 миллион еврога баҳоламоқда.
Бундан ташқари, “Реал” “Ливерпуль” ҳимоячиси Трент Александер-Арнольд билан ҳам келишувга эришган. Айни пайтда “қироллик клуби” англиялик футболчи билан Клублар ўртасидаги Жаҳон чемпионатига қадар шартнома имзолашни истаётгани маълум қилинган эди.
Шунингдек, яқинда “қаймоқранглилар” раҳбарияти арзон-гаров футболчи қидираётгани, шу боис “Борнмут” ҳимоячиси Милош Керкеш ва “Бенфика” футболчиси Альваро Фернандеш трансферидан воз кечгани маълум қилинди.
Изоҳ (0)