Ерга 30 метрлик астероид яқинлашмоқда. У 2023 йилдаги энг катта астероидлардан биридир

Астрономлар томонидан яқинда кашф қилинган 2023 EY астероиди Ерга яқинлашмоқда. Бу ҳақда The Watchers нашри хабар берди. 

Астероид 17 март куни Тошкент вақти билан соат 16:43 да Ердан 239 минг километр масофа узоқликда учиб ўтади. 2023 EY астероиди Apollon астероидлар гуруҳига киради. У биринчи марта 13 март куни, Ерга яқинлашишдан 4 кун олдин топилган. Унинг тахминий диаметри 14 дан 30 метргача бўлиб, бу 2023 йилги иккинчи энг катта астероид ҳисобланади.

Аввалроқ Америка аэрокосмик агентлиги (NASA) 23 йилдан кейин, яъни 2046 йил 14 февраль куни Ерга 2023 DW номли астероид тушиши мумкинлигини маълум қилганди. 2023 DW астероиднинг диаметри тахминан 49,29 метрни ташкил этади ва ҳозир Ердан тахминан 0,12 астрономик бирлик масофасида жойлашган. 2023 DW Турин шкаласи бўйича 1 баллга эга бўлган “хавфли рўйхатдаги” ягона астероиддир.