Америка аэрокосмик агентлиги (NASA) 23 йилдан кейин, яъни 2046 йил 14 февраль куни Ерга 2023 DW номли астероид тушиши мумкинлигини маълум қилди. Бу ҳақда New York Post хабар берди.
2023 DW астероиднинг диаметри тахминан 49,29 метрни ташкил этади ва ҳозир Ердан тахминан 0,12 астрономик бирлик масофасида жойлашган. Астрономик бирлик Ер маркази ва Қуёш маркази орасидаги ўртача масофа ҳисобланади. Қуёшга нисбатан астероид секундига тахминан 24,64 километр тезликда ҳаракатланмоқда. 2023 DW Қуёш атрофини тахминан 271 кун давомида бир марта айланади. У NASA’нинг потенциал хавфли астероидлар рўйхатида Ерга таъсир қилиш эҳтимоли нолдан юқори бўлган космик объектларнинг биринчи ўрнида туради.
2023 DW Турин шкаласи бўйича 1 баллга эга бўлган “хавфли рўйхатдаги” ягона астероид бўлиб, бу Ер билан тўқнашиш хавфини таснифлаш учун ишлатилади. Қолган астероиднинг ҳаммаси 0 баллга эга. Ерга яқин объектларни ўрганиш маркази маълумотларига кўра, 1 балл тўқнашув эҳтимоли “даргумон ва жамоатчиликни ташвишга солмайди”.
NASA 2023 DW’ни кузатиб, унинг "2046 йилда Ерга тушиши эҳтимоли кам" эканини билдирмоқда.
“Кўпинча янги объектлар биринчи марта кашф этилганда, ноаниқликларни камайтириш ва уларнинг ҳаракатини йиллар давомида прогноз қилиш учун бир неча ҳафталик маълумотлар керак бўлади. Таҳлилчилар унинг ҳаракатини кузатишда давом этади”, деб ёзди NASA Аsteroid Watch Twitter’да.
Изоҳ (0)