АҚШ президенти Дональд Трамп 10 август куни Вашингтонда жиноятчиликка қарши курашиш режасини эълон қилар экан, пойтахтдаги уйсизлардан дарҳол шаҳарни тарк этишни талаб қилди. Бу ҳақда BBC хабар берди.
Трампнинг айтишича, пойтахтдаги уйсизлар учун махсус бошпаналар тақдим этилади, улар аммо пойтахтдан узоқда жойлашади. Президент ўзининг ушбу қарори бўйича ижтимоий тармоқлардан бирида шундай пост қолдирган:
“Биз сизни бошпана билан таминлаймиз, аммо пойтахтдан жуда узоқда. Жиноятчилар эса кўчмайди — уларни қамоққа жойлаймиз”.
АҚШ президенти, шунингдек, шаҳарни “мисли кўрилмагандек хавфсиз ва чиройли қилиш” бўйича 11 август куни Оқ уйда матбуот анжумани ўтказишини маълум қилган.
Вашингтон мэри, демократ Муриэль Боузер, президентнинг бу талабларига жавобан ҳозирда шаҳарда жиноятчилик даражаси анча паст эканини қайд этган.
“Шаҳарда 2023 йилда жиноятлар кўп қайд этилганди. Аммо 2025 йилда уларнинг даражасини сўнгги 30 йилдаги энг паст кўрсаткичга туширишга эришдик”, деди у.
Таъкидланишича, Дональд Трамп июль ойида уйсизларни ҳибсга олиш бўйича фармон имзолаган. Ушбу фармон доирасида ўтган ҳафта федерал ҳуқуқ-тартибот органлари Вашингтон кўчаларида рейд ўтказишни бошлаган. Бу ҳаракатларга Қўшма Штатлар полицияси, Гиёҳванд моддалар айланмасига қарши кураш агентлиги, Федерал қидирув бюроси ва АҚШ маршаллари хизматидан жами 450 га яқин ходим жалб этилган.
Пойтахтдаги жиноятчилик даражаси бошқа йирик АҚШ шаҳарларига нисбатан юқорироқ бўлиб қолмоқда. Маълум қилинишича, шаҳарда 2025 йилнинг ҳозирги давригача 98 та қасддан одам ўлдириш ҳолати қайд этилган. Аммо умумий зўравонлик жиноятлари (ўғирлик, талончилик, қуролли ҳужум) бўйича 2024 йилда 30 йилликдаги минимум кўрсаткич қайд этилган.
Маълумотларга кўра, 700 минг аҳолига эга Вашингтонда ўртача 3782 нафар уйсиз шахс мавжуд. Уларнинг 800 га яқини ҳар куни тунни кўчаларда ўтказади. Шаҳар мэри президентнинг полиция устидан тўлиқ назорат ўрнатиш таҳдидини ҳам қоралаб, шундай деди:
“Бизнинг қонунчилигимиз бунга фақат аниқ шароитларда рухсат беради. Ҳозирда ҳолатни бундай деб баҳолай олмаймиз”.
Изоҳ (0)