Исроил ҳужуми оқибатида Al-Jazeera телеканалининг беш нафар ходими ҳалок бўлди. Уларнинг Ғазодаги палаткасига авиазарба берилди.
Қурбонлар орасида мухбир Анас ал-Шариф ва унинг тўрт нафар ҳамкасби бор. Ҳужум пайтида улар Ал-Шифо касалхонаси ҳудудига кираверишдаги палаткада бўлган. Исроил мудофаа кучлари журналистларни нишонга олганини тасдиқлаган.
Расмий баёнотда Анас ал-Шариф “Исроилнинг тинч аҳолиси ва ҳарбийларига қарши ракета ҳужумлари уюштиришда жавобгар”ликда айбланган. Шунингдек, Исроил у “қуролли гуруҳларга мансублиги” ва “террорчиликка тайёргарлик курсларида қатнашгани” ҳақидаги разведка маълумотига эгалигини даъво қилган.
Зарба беришдан олдин тинч аҳоли учун оқибатларни минималлаштириш чоралари кўрилди: юқори аниқликдаги қуроллар қўлланилди, ҳаводан кузатув олиб борилди, қўшимча разведка маълумотлари олинди, дейилади Исроил баёнотида.
Al-Jazeera маълумотларига кўра, ҳужум оқибатида жами етти киши ҳалок бўлган. Телеканал ўз ходимларига берилган зарбани “матбуот эркинлигига сурбетларча ва қасддан қилинган ҳужум” деб атаган.
Телекомпания бош муҳаррири Муҳаммад Муаваднинг айтишича, марҳум ал-Шариф аккредитациядан ўтган журналист бўлиб, у орқали бутун дунё Ғазода бўлаётган воқеалардан хабардор бўлиб турган. Исроил эса секторга хорижий журналистларни киритмайди.
Ўлимидан олдин, 28 ёшли ал-Шариф Х ижтимоий тармоғида Исроилнинг Ғазо шаҳрининг шарқий ва жанубий қисмларини интенсив бомбардимон қилаётгани ҳақида ёзган эди.
Изоҳ (0)