Беларусь президенти Александр Лукашенко Россия билан бўлажак қўшма ҳарбий машғулотлар мақсадини маълум қилди.
Қўшма ҳарбий машқлар Беларусь ҳудудида бўлиб ўтиши режалаштирилган. Лукашенко Россия мудофаа вазири Андрей Белаусов билан бу масалани муҳокама қилган.
Айтмоқчиманки, машқларга тайёрмиз. Ҳеч кимдан ҳеч нарсани яширмаймиз. Биз чиндан ҳам бу машқлар ўзимизники эканини ва мудофаа хусусиятига эга эканини очиқ-ойдин кўрсатмоқдамиз. Баъзилар ўйлаганидек, биз ҳеч кимга ҳужум қилмоқчи эмасмиз. Майли, бу уларнинг иши. Ўйлайверишсин. Бизда машқларни ўтказиш бўйича президентлар даражасида қарор қабул қилинган, деди Беларусь президенти.
Лукашенко рус ҳамкасби Владимир Путин билан бу масалани аллақачон муҳокама қилганига тўхталди.
Гап бизнинг қисмимизга, яъни Беларусь полигонларига тааллуқли бўлса, биз тайёрмиз. Режага мувофиқ, керакли жойларга — Россия полигонларига учиб боришга ҳам тайёрмиз. Аксинча — Россия қўшинларини қабул қилишга, Иттифоқ давлатида тузилган қўшма қўшинлар гуруҳининг машғулотларини ўтказишга ҳам тайёрмиз. Бу борада Россия хавотир олмаса ҳам бўлади. Биз жуда пухта тайёргарлик кўрамиз. Бизнинг Беларусь томони, параддаги каби, бошқа ҳарбий бўлинмалардан кам кўринмайди, дея таъкидлади у.
Турли ҳисоб-китобларга кўра, қўшма машқларда 100 минггача одам жалб қилиниши мумкин. Сўнгги “Ғарб-2021” машғулотларида 200 мингга яқин киши иштирок этган. Бу “Ғарб” учун катта фарқ билан мутлақ рекорд ҳисобланади. Расмий ёпилиш маросими сентябрь ойида бўлиб ўтган ва 2021 йил декабрь ойида Лукашенко ва Путин “Иттифоқ давлатининг ғарбий чегараларида ва Беларуснинг жанубий қисмида режадан ташқари аниқ тадбирлар ўтказиш” ҳақида келишиб олган. Бу “Иттифоқдош қатъият — 2022” машғулотларига айланган.
Улар якунлангач, Россия қўшинлари Беларусь ҳудудидан олиб чиқилмаган ва 2022 йил 24 февралда Украинага бостириб киришда фойдаланилган. Шунингдек, Лукашенко Украинадаги урушга жўнатилишидан олдин сафарбар қилинган россияликларни ўқитиш ва машқ қилдириш учун Беларусь полигонларини тақдим этган.
Изоҳ (0)