Президент қарори билан 2025 йил 1 декабрдан Экология вазирлиги атроф табиий муҳитнинг давлат мониторинги тизими маълумотлари базаларининг жамоатчилик учун очиқлигини таъминлайди. Бу ҳақда Адлия вазирлиги хабар берди.
Тизимда қуйидаги маълумотлар жойлаштириб борилади:
- ҳар йили “Яшил макон” умуммиллий лойиҳаси доирасида экиладиган дарахт ва кўчатлар ҳақида;
- дарахт ва буталарни кесиш учун юридик ва жисмоний шахслар томонидан рухсат этиш хусусиятига эга ҳужжатни олиш мақсадида тақдим этилган аризалар ҳақида;
- сув ҳавзаларида норуда материалларни қазиб олиш бўйича жорий қилинган мораторий тартибини бузган шахслар ҳақида.
2025 йилдан ҳар йили “Яшил макон” умуммиллий лойиҳаси доирасида “Янги дарахт — янги нафас” республика экочемпионати амалга ошириб борилади. Шунингдек, ҳар ойда 1 маротаба “Маҳаллани чиқиндидан холи ҳудудга айлантирамиз” шиори остида акциялар, ташвиқот тадбирлари ўтказилади.
Бундан ташқари, олий таълим муассасалари талабалари томонидан Ўзбекистон эковолонтёр талабалари ҳаракати ташкил этилади.
Аввалроқ давлат органлари ходимларининг экологик билимини оширишга қаратилган бепул ўқув курслари ташкил этилиши ҳақида хабар берилганди.
Изоҳ (0)