Ўзбекистонда экологик носоз деб топилган машиналар ҳайдовчиларига чора кўрилади, деб хабар бермоқда Экология вазирлиги ахборот хизмати.
Маълум қилинишича, Экология, атроф-муҳитни муҳофаза қилиш ва иқлим ўзгариши вазирлиги ҳамда Ички ишлар вазирлиги билан ҳамкорликда Қорақалпоғистон Республикаси, вилоятлар марказлари ва Тошкент шаҳрида навбатдаги “Тоза ҳаво” ойлиги ўтказилади.
Тадбир “Атмосфера ҳавосини муҳофаза қилиш тўғрисида”ги ҳамда “Экологик назорат тўғрисида”ги қонунлари ижросини таъминлаш, фойдаланишда бўлган автотранспорт воситаларининг экологик ҳолатини назорат қилиш мақсадида икки босқичда бўлиб ўтади.
Биринчи босқич 10 апрелдан 10 майгача, иккинчи босқич эса 10 августдан 10 сентябргача ташкил этилади (Тошкент шаҳрида 10 сентябрь—10 октябрь).
“Тоза ҳаво” ойлиги давомида мунтазам ЙПХ масканларида, мажбурий техник кўрикдан ўтказишда ҳамда кўчаларда ҳаракатланаётган автотранспорт воситалари текширилади. Экологик носоз деб топилган автотранспорт воситалари ҳайдовчиларига нисбатан Маъмурий жавобгарлик тўғрисидаги Кодекснинг 87- ва 125-моддаларига кўра чоралар кўрилади.
Шунингдек, “Атмосфера ҳавосини муҳофаза қилиш тўғрисида”ги қонуннинг 13-моддасига асосан, автотранспорт воситаларидан носозлиги бартараф этилгунга қадар фойдаланиш тақиқланади.
2023 йилги “Тоза ҳаво” ойлиги тадбирлари давомида автотранспортларнинг юз мингтаси носоз экани аниқланган эди. Мамлакатда жисмоний шахсларга тегишли жами 3 268 480 та автотранспорт воситаси фойдаланишда бўлиб, шундан 796 034 таси (24 фоиз) бензин, 71 088 таси (2 фоиз) дизель ва 2 401 348 таси (74 фоизи) газда ҳаракатланишга мўлжалланган.
Изоҳ (0)