Тошкент вилоятининг Бўстонлиқ туманида ўтказилган рейд давомида “Оқсоқ ота” сойи қирғоғида MAN юк машинаси эгалари экскаватор ёрдамида қум-шағал аралашмасини махсус рухсатномасиз қазиб олаётгани аниқланди. Бу ҳақда Экология вазирлиги хабар берди.
Натижада қонунлар талаблари бузилган ҳамда табиатга 4 млрд 504 млн 378 минг 636 сўм миқдорида зарар етказилган.
Ҳолат юзасидан Бўстонлиқ туман ИИБ ЙПХ ходими ёрдамида 1 дона юк машинаси вақтинчалик сақлаб туриш учун жарима майдончасига жойлаштирилди.
Тўпланган ҳужжатлар эса Бўстонлиқ туман прокуратурасига юборилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)