Самарқанд вилоятида чорва моллари кўчатларни шикастлантиргани учун икки киши 10,5 млн сўм тўлайдиган бўлди. Бу ҳақда вилоят Экология бошқармаси хабар берди.

Маълум қилинишича, Каттақўрғон тумани Экология, атроф-муҳитни муҳофаза қилиш бўлими давлат инспекторлари томонидан туманнинг “Алижон” ва “Мелихўжа” маҳалласи ҳудудида кузатув рейд тадбири олиб борилган.
Унда Жума—Каттақўрғон йўл ёнига яшил белбоғ шаклида экилган манзарали дарахтлар атрофига ушбу маҳаллаларда яшовчи фуқаролар А.Н. ва Ж.Б. чорва молларни ўтлатиши натижасида бир неча туб манзарали дарахт кўчати шикастлангани аниқланган.
Шу боисдан ҳуқуқбузарларнинг ҳар бирига Маъмурий жавобгарлик тўғрисидаги кодекснинг тегишли моддаларига биноан баённомалар тузилиб, БҲМнинг йигирма беш баробари — 9 375 000 сўм миқдорида жарима ва 1 125 000 сўм миқдорида ўсимлик дунёсига етказилган зарар ҳисобланди.
Сентябрь ойида Бухоро вилояти Жондор туманида саксовул буталарини синдирган фуқарога жарима қўлланган эди. Фуқарога нисбатан 9 452 000 сўм жарима ҳамда табиатга етказилган зарар қўлланганди.
Шунингдек, Бухоро вилоятида сентябрь—октябрь ойлари давомида саксовул билан боғлиқ 25 та ҳуқуқбузарлик аниқлангани ҳақида хабар берилганди.
Мазкур даврда 25 та ҳолатда табиатга 29 миллион 702 минг 400 сўм зарар етказилгани ҳисобланган ва 222 миллион 900 минг сўм жарима тайинланган. Ҳуқуқбузарлар жами 252 миллион 602 минг 400 сўм товон тўлашлари белгиланган. Бухородаги чўллардан саксовул синдириб олиб кетаётган шахсларга қарийб 40 млн сўм жарима белгиланганди.
Йиллар кесимида статистика
2022 йилда қимматбаҳо дарахтларнинг ноқонуний кесилиш ҳолатлари 1669 тани ташкил қилиб, 2021 йилга нисбатан 2513 тага ёки 61 фоизга камайган. 2023 йилда эса қимматбаҳо дарахтларнинг ноқонуний кесилиш ҳолатлари 1097 тага етиб, 2022 йилга нисбатан 572 тага ёки 35 фоизга қисқарган. 2024 йилга келиб қимматбаҳо дарахтларни ноқонуний кесиш ҳолатлари 1098 тани ташкил қилган.
Изоҳ (0)