Самарқанд вилоятининг Жомбой туманидан оқиб ўтувчи Оқдарё дарёсининг муҳофаза этиладиган ҳудудида навбатдаги рейд тадбири ўтказилди. Бу ҳақда Экология вазирлиги матбуот хизмати хабар берди.
Маълум қилинишича, рейд давомида дарё ҳудудида “М.Т.” фермер хўжалиги вакиллари томонидан экскаватор ва юк машиналари воситасида ҳеч қандай рухсатномасиз ноқонуний равишда қум-шағал аралашмаси қазиб олингани аниқланди.
Натижада бир қатор қонун талаблари бузилган. Табиатга 137 млрд 472 млн 370 минг 649 сўм зарар етказилган.
Ҳолат юзасидан экскаватор ва иккита юк ташувчи транспорт воситаси жарима майдонига жойлаштирилди.
Шунингдек, тўпланган ҳужжатлар ҳолатга ҳуқуқий баҳо бериш ва чора кўриш мақсадида Бош прокуратурага юборилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)