Ижтимоий тармоқларда Бойсун Давлат ўрмон хўжалиги ҳудудида Зарафшон арчалари таг қисмидан кесилаётгани ҳақида хабарлар тарқалди. Ҳолат юзасидан Сурхондарё вилояти Экология, атроф-муҳитни муҳофаза қилиш ва иқлим ўзгариши бошқармаси изоҳ берди.
Маълум қилинишича, ўрмон хўжалигига қарашли Кенгдала ўрмон бўлимининг Шаппа, Мовирли, Қора булоқ, Чоршанби ва Ўрикли массивларида олиб борилган назорат тадбирлари давомида жами 53 туп турли диаметрдаги Зарафшон арчалари ноқонуний равишда кесилгани, 3 туп арчага эса ўсишдан тўхтайдиган даражада зарар етказилгани аниқланди.
Мазкур ҳуқуқбузарликлар бўйича ўрмон хўжалиги ходимлари томонидан ваколат доирасида чора кўрилмаган.
Ушбу ҳолат юзасидан ўсимлик дунёсига етказилган зарар миқдори ҳисоблаб чиқилди.
Табиатга етказилган зарар миқдори БҲМнинг 300 бараваридан ортиқлиги (112,5 млн сўмдан) сабабли ҳолат бўйича тўпланган ҳужжатлар ҳуқуқни муҳофаза қилувчи органларга тақдим этилди.
Аёвсиз кесилаётган дарахтлар
Тошкент вилоятида 2 туп кўп йиллик чинорни кесган шахс табиатга 199 млн сўм зарар етказгани ҳақида хабар берилганди. Хоразмда 4 туп павловния дарахтини кесган шахс 27 млн сўмдан ортиқ жаримага тортилганди.
Шунингдек, Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди. Шу билан бирга, Тошкент вилоятида 4 туп ёнғоқ дарахтини кесган шахс табиатга 247 млн сўм зарар етказганди.
Бундан ташқари, Жиззахда тут дарахтлари кесилиши оқибатида ўсимлик дунёсига 738 млн сўмлик зарар етказилган.
Жиззах вилоятида эса 19 туп дарахт кесилиши оқибатида табиатга 435 млн сўмлик зарар етказилгани хабар қилинганди.
Бу бўйича қонун
Ўзбекистонда дарахт кесганлик учун жазо чораларини кучайтириш кўзда тутилган қонун 2024 йил 1 мартдан кучга кирган.
Унга кўра дарахтлар, буталар, бошқа ўсимликлар ва ниҳоллар қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказганлик учун:
- фуқаролар БҲМнинг 25 бараваридан 50 бараваригача — 8 миллион 500 минг сўмдан 17 миллион сўмгача (шу пайтга қадар БҲМнинг 5 бараваридан 10 бараваригача эди),
- мансабдорлар БҲМнинг 50 бараваридан 75 бараваригача, яъни 17 миллион сўмдан 25 миллион 500 минг сўмгача (шу пайтга қадар БҲМнинг 10 бараваридан 15 бараваригача) жаримага тортилади.
Ўзбекистонда ноқонуний дарахт кесишга доир мораторий жорий этилгунга қадар бўлган даврга нисбатан бу каби қонунбузарликлар 60 фоизга камайган. 2025 йилнинг ўтган даврида республика бўйича 848 туп дарахт ноқонуний кесилиб, табиатга жиддий зиён етказилган. Ҳар бир ҳолатда айбдор шахсларга нисбатан қонунга мувофиқ жазо чоралари қўлланилган.
Изоҳ (0)