Ноқонуний қум-шағал аралашмасини ковлаб олаётган шахсларга жарима қўлланилди, деб хабар бермоқда Наманган вилояти Экология бошқармаси ахборот хизмати.
Маълум қилинишича, Наманган вилояти Экология бошқармаси тезкор гуруҳи томонидан Уйчи туманидан оқиб ўтувчи Норин дарёсида навбатдаги рейд тадбири ташкил этилди. Мазкур рейд давомида туманнинг уч нафар фуқаро томонидан ўз бошқарувидаги экскаватор Норин дарёси ўзанидан ноқонуний қум-шағал қазиб олиб, юк ташувчи машиналарга юклаётгани аниқланди.
Ҳолат бўйича ҳуқуқбузарларнинг ҳар бирига Маъмурий жавобгарлик тўғрисидаги кодекснинг 70-1-моддаси 1-қисмига билан базавий ҳисоблашнинг 50 баробари 18 750 000 сўмдан жами 56 250 000 сўм жарима тайинланди.
Маълумот учун, Маъмурий жавобгарлик тўғрисидаги кодексининг 70-1-моддасининг 1-қисмида дарёларнинг ўзанларини тозалашга ва қирғоқларини мустаҳкамлашга доир ишларни амалга ошириш тартибини бузганлик учун жавобгарлик белгиланган бўлиб, унга кўра фуқароларга базавий ҳисоблаш миқдорининг ўттиз бараваридан эллик бараваригача, мансабдор шахсларга эса — эллик бараваридан юз бараваригача миқдорда жарима солиниши белгилаб қўйилган.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)