Қашқадарё вилоятида ижтимоий тармоқлар орқали овчи қушни ноқонуний сотаётган фуқаро ушланди. Бу ҳақда Экология вазирлиги хабар берди.
Унда айтилишича, Қашқадарё вилояти Экология, атроф-муҳитни муҳофаза қилиш ва иқлим ўзгариши бошқармаси ходимлари томонидан фуқаро Ш.М. ижтимоий тармоқлар орқали овчи қуш ноқонуний сотилаётгани аниқланди.
Бошқарма ходимлари ҳолатга чек қўйиш мақсадида фуқаро билан харидор сифатида боғланди ва қушни сотиб олишга келишишди. Белгиланган жойда Ш.М. келишилган пулни санаб олиб, ходимларга қушни бераётганида ашёвий далиллар билан ушланди.
Қуш вазиятга тўлиқ ойдинлик киритилгунга қадар Шаҳрисабз шаҳридаги ҳайвонот боғига вақтинча топширилди. Шунингдек, қушнинг турига аниқлик киритиш учун ҳужжатлар Фанлар академиясига юборилди. Фанлар академиясининг хулосасига асосан зарар миқдори белгиланади ва ҳуқуқбузарга тегишли чора кўрилади.
Маълумот учун, аввалроқ Тошкент шаҳри ва Фарғона вилоятида ҳам қушларнинг ноқонуний савдосига чек қўйилганди.
Бундан аввал Хоразм вилоятининг Урганч шаҳрида ноқонуний сақланаётган шер ҳайвонот боғига топширилган эди. Шунингдек, Тошкент шаҳар Олмазор туманида фуқаро ўз уйида Қизил китобга киритилган қушларни сақлаб келаётгани аниқланганди.
Изоҳ (0)