Лондон ва Берлин 2 минг километрдан ортиқ масофага зарба берувчи юқори аниқликдаги қурол лойиҳаси устида биргаликда ишлайди. Бу ҳақда Буюк Британия ҳукуматига таяниб, Reuters хабар берди. Украинадаги уруш сабаб ҳар икки мамлакат ўзаро мудофаа ҳамкорлигини кучайтирди.
Мазкур лойиҳа икки давлат ўтган йили имзолаган мудофаа битимининг бир қисми ҳисобланади. Ўшанда Берлин ва Лондон Европа ўз хавфсизлигини мустақил ҳимоя қила олиши зарурлигини таъкидлаган эди.
Ушбу келишувдан сўнг, Дональд Трамп АҚШ президентлигига қайта сайланди. У Европадаги иттифоқчиларини қитъа хавфсизлиги учун масъулиятни ўз зиммасига олишга чақириб, кескин баёнотлар берди. Бу эса минтақа ҳукуматларини миллий мудофаа саноатини кучайтириш бўйича шошилинч ҳаракатларга ундади.
Британия мудофаа вазири Жон Хили ва Германия мудофаа вазири Борис Писториус янги қурол лойиҳасини Берлиндаги учрашувда расман эълон қилади.
“Бугунги хавфли дунёда НАТО ва Европа иттифоқчилари бирлашган. Бу ҳамкорлик мудофаани ўсиш двигателига айлантиради — иш ўринлари яратади, малакаларни оширади ва Буюк Британия ҳамда Германияда сармоя жалб қилади”, деди Хили.
Лекин баёнотда лойиҳа бюджети, муддатлар ёхуд бошқа жиҳатларга оид тафсилотлар очиқланмади.
Изоҳ (0)