АҚШ президенти Жо Байден 22 февраль куни Алексей Навальнийнинг беваси ва қизи билан самимий ҳамдардлик билдириш учун учрашди. Бу ҳақда “Америка овози” хабар берди.
Калифорниядаги учрашувда АҚШ президенти Навальнийнинг “эркин ва демократик Россия учун коррупцияга қарши курашдаги фавқулодда жасорати ва мероси, бунда қонун устуворлиги ҳамма учун бирдек амал қилиши”дан ҳайратда эканини билдирди.
“Бугун мен Алексей Навальнийнинг яқинлари Юлия ва Даша Навальнаялар билан учрашиб, уларнинг фожиали йўқотишлари учун ҳамдардлик билдирдим. Алексейнинг жасорат мероси Юлия ва Дашада, шунингдек, Россия бўйлаб демократия ва ва инсон ҳуқуқлари учун курашаётган сон-саноқсиз одамларда сақланиб қолади”, — деди Оқ уй раҳбари.
Байден АҚШ Навальнийнинг ўлими, Россия репрессияси ва агрессияси ҳамда Украинага қарши урушига жавобан 23 февраль куни Россияга қарши янги санкциялар эълон қилишини тасдиқлади.
“Ушбу чора-тадбирлар тўплами Россиянинг мудофаа ва саноат базасини ўз ичига олган бир қатор объектларга, шунингдек, Россия иқтисодиёти учун даромад манбаларига қаратилган бўлади”, — деди президентнинг миллий хавфсизлик бўйича маслаҳатчиси Жейк Салливан.
Алексей Навальний ўлими
Россиялик сиёсатчи, Путиннинг ашаддий танқидчиси Алексей Навальний 16 февраль куни колонияда вафот этди. Россия қамоқхона хизматига кўра, у “сайрдан кейин ўзини ёмон ҳис қилган ва ҳушини йўқотган”. Ўлимга дастлаб тромб ёрилгани сабаб бўлгани айтилган.
“Оммавий ахборот воситаларида ёзилаётган ва Жазони ижро этиш Федерал хизмати томонидан эълон қилинган хабарда Алексей Навальний тромб ёрилишидан вафот этгани айтилмоқда. Аммо буни ҳозирча тасдиқлаб бўлмайди, чунки бу касалликни аниқлаш учун аввал мурдани ёриб кўриш керак”, — деган Навальнийни даволаган шифокор Полупанов.
Ўз навбатида, Тергов қўмитаси терговчилар марҳумнинг жасадини текширмоқчи.
“Алексей Навальнийнинг жасади зудлик билан оиласига берилишини талаб қиламиз”, — дейди сиёсатчининг матбуот котиби.
Изоҳ (0)