Хитойда ишлаб чиқарилган қуёш энергияси инверторларида номаълум алоқа ускуналари топилган. Бу ҳақда АҚШ энергетика расмийларига таяниб Fox News хабар берди.
Хавфсизликни текшириш мақсадида дарҳол ускуналар ечиб олинган.
Хитойда ишлаб чиқариладиган қувват инверторлари бутун дунёда қуёш панеллари ва шамол турбиналарини электр тармоқларига улаш учун ишлатилади. Улар аккумуляторлар, иссиқлик насослари ва электр транспорт воситаларини зарядлашда ҳам қўлланади.
Бу каби инверторлардан фойдаланадиган коммунал компаниялар одатда Хитойдан хавфсираган ҳолда хавфсизлик деворлари ўрнатади. Бу деворлар маълумотлар ташқарига чиқишининг олдини олади.
Сўнгги тўққиз ой ичида бир нечта хитойлик етказиб берувчиларнинг батареяларида ҳужжатсиз алоқа қурилмалари, жумладан, уяли радиолар ҳам топилгани маълум қилинган.
“Хитой бизнинг инфратузилмаларимизни вайрон қилиш ёки хавф остига қўйишдан манфаатдор. Менимча, хитойликлар инверторлардан кенг фойдаланиш Ғарбнинг хавфсизлик муаммосини янада кучайтиради деб ўйлайди”, деди АҚШ Миллий хавфсизлик агентлигининг собиқ директори Майк Рожерс.
Бунга жавобан Хитойнинг Вашингтондаги элчихонаси вакили шундай деди: “Хитойнинг инфратузилма ютуқлари бузиб кўрсатилиши ва қораланишига қаршимиз.”
Экспертларнинг фикрича, инверторларни масофадан ўчириш ёки уларнинг созламаларини ўзгартириш учун ёлғон алоқа воситаларидан фойдаланиш электр тармоқларини беқарорлаштириши, энергия инфратузилмасига зарар етказиши ва кенг кўламли электр таъминоти узилишига олиб келиши мумкин.
Бу каби яширин фирибгарлик қурилмалари мавжудлиги ҳақида АҚШ ҳукумати илгари хабар бермаган. АҚШ Энергетика вазирлигидан изоҳ сўралганда, улар ривожланаётган технологиялар билан боғлиқ хавфларни доимий равишда ўрганиб келаётганини ҳамда уларни ҳужжатлаштиришда жиддий қийинчиликларга дуч келаётганини таъкидлаган. АҚШ ва Хитой ўртасидаги зиддият кучайиб борар экан, Қўшма Штатлар ва бошқа мамлакатлар Хитойнинг стратегик инфратузилмадаги ролини қайта кўриб чиқмоқда.
“Хитой Коммунистик партияси бизга, ҳақиқатан, таҳдид қилмоқда ва бу тобора ўсиб бормоқда. Улар бизнинг муҳим инфратузилмаларимизни нишонга олиш учун ҳеч нарсадан тап тортмайди”, деди АҚШ Конгресси Вакиллар палатаси аъзоси Август Пфлюгер.
2025 йилнинг февраль ойида АҚШ 2027 йил октябрь ойидан бошлаб миллий хавфсизлик нуқтайи назаридан Хитойнинг баъзи компанияларидан батареялар сотиб олишни тақиқловчи “Хорижий душман батареяларига қарамликдан халос бўлиш тўғрисида”ги қонунни қабул қилган эди. Қонун лойиҳаси 11 март куни Сенатнинг Ички хавфсизлик ва ҳукумат масалалари қўмитасига юборилган ва ҳалигача қабул қилинмаган.
Унга кўра, Хитой Коммунистик партияси билан чамбарчас боғлиқ бўлган олтита Хитой компанияси: Contemporary Amperex Technology Company, BYD Company, Envision Energy, EVE Energy Company, Hithium Energy Storage Technology Company, ва Gotion High-tech Companyʼдан батареялар сотиб олиш тақиқланган. Бундан ташқари, АҚШ 2019 йилдан бери Huaweiʼнинг мамлакатга киришини чеклаб, компанияни миллий хавфсизликка зид фаолиятда айблаган. Huawei эса буни рад этган.
Изоҳ (0)