AQSH prezidenti Donald Tramp ma’muriyati 15-may kuni hukumat grantlaridan mahrum bo‘lgan “Amerika ovozi” radiostansiyasining 600 ga yaqin xodimini ishdan bo‘shatdi. Bu haqda New York Times gazetasi xabar bermoqda.
“Tramp ma’muriyati payshanba kuni radiostansiyaning 600 ga yaqin xodimini ishdan bo‘shatdi. Ishdan bo‘shatish shartnoma asosida ishlaydigan xodimlarga, asosan jurnalistlarga, shuningdek, ba’zi ma’muriy xodimlarga ta’sir qildi. Bu xodimlarning uchdan bir qismidan ko‘prog‘ini tashkil etadi”, deyiladi nashr xabarida.
“Amerika ovozi” direktori Maykl Abramovis xodimlarga yo‘llagan elektron xatida ishdan bo‘shatishlarni “tushunarsiz” deb atagan.
Ta’kidlanishicha, ishdan bo‘shatilgan jurnalistlarning bir qismi iyun oyi oxirigacha AQSHni tark etishi kerak, chunki ularning immigratsion maqomi yangiliklar tashkilotidagi ishi bilan bog‘liq edi.
AQSH Global media agentligi (USAGM) katta maslahatchisi Keri Leykning so‘zlariga ko‘ra, ommaviy axborot vositalari xodimlari AQSH prezidenti ma’muriyatining qonuniy vakolatlariga va rejalashtirilgan “federal byurokratiyani qisqartirish”ga muvofiq ishdan bo‘shatilgan.
Aprel oyi oxirida AQSH federal sudyasi Roys Lambert hukumatga “Amerika ovozi” radiostansiyasini o‘z ichiga olgan AQSH Global media agentligi (USAGM) faoliyatini qayta tiklash, shuningdek, agentlikning barcha xodimlarini qayta ishga olish majburiyatini yukladi. Qaror “Amerika ovozi”ning bir qator xodimlari tomonidan USAGMni tarqatib yuborish to‘g‘risidagi qaror yuzasidan berilgan da’vo arizasini ko‘rib chiqish jarayonida qabul qilindi.
Donald Tramp prezidentligining boshida byurokratiyaga qarshi kurash doirasida bir nechta idoralarning funksiyalari va ishini maksimal darajada qisqartirish to‘g‘risidagi farmonni imzoladi. Ular orasida “Ozod Yevropa/Ozodlik radiosi” va “Amerika ovozi”ni nazorat qiluvchi AQSH hukumatining Global media agentligi (USAGM) ham bor edi.
Trampning qaroriga ko‘ra, ba’zi davlat tashkilotlari o‘z funksiyalari va xodimlarining faoliyatini AQSH qonunchiligida ko‘zda tutilgan minimal darajagacha qisqartirishi kerak edi.
Izoh (0)